Dibadaha raggii aaday  waa gabay ka sheekaynaya qaar ka mid ah xaaladaha iyo 

duruufaha ay ku sugan yihiin dadka Soomaaliyeed ee qurbaha ku dhaqan. Wuxuu yidhi:  

- Dibadaha raggii aaday iyo, dumarkii Soomaali 

- Duruufaha qabsaday baan badhkood, dood ka leeyahaye 

- Dadoow maqal dareenkaan qaboo, gabay ku deelaysan 

- Ninkii Damac leh ee eebahay, dawga garansiiyay 

- Durba wuxuu abbaaraa halkay, door ka leedahaye 

- Dan la'aan waqtigii uu lahaa, ooma daayaca e 

- Nimanbaa cimaarado datiyo, daaro fooqya lehe 

- Nimanbaa dayuurado gatiyo, doonyo shaaximane 

- Nimanbaa diktoor sare noqdiyo, caalin daahfurane 

- Nimanbuu ka soo galay dakhligu, dirac ay iibsheene 

- Dusha niman xamaalka u dhigtoo, daalin baa jira e 

- Dibjir hawlihiisii gaboo, dowdaraa badane 

- Niman bay dillaal iyo mallaal, daawadood tahaye 

- Rag badan baa daroogada ku gada, meel dariiqya ahe 

- Nimanbuu khamaar daashadiyo, doollar baad heliye 

- Nimanbaa darmada jaad sidii, wayla doog helaye 

- Nimanbaa dacwado soo dhistiyo, duubigay jabane 

- Qaar baa dad kale raacay oo, doorshay dhaqankiiye 

- Dugsiyada rag badan baa ka dhiga, diinta eebahaye 

- Qaar baa bulshada ooga diga, inay dayoobaane 

- Niman baa siyaaso u dalbaday, doorashiyo foode 

- Nimanbaa dayacay reerahay, dibadda gaysteene 

- Dambi midaan samayn baa afadii, loogu daw galaye 

- Nimanbuu dabayl roob watiyo, dayra dhaaf helaye

- Nimanbuu qabaw aad u daran, daakhilkaw galaye 

- In badan oo waqtigu diiq gashoo, diif qabaa jira e

- Dacallada aduunyada rag baa, duullimaad ku ahe 

- Daruuraha mar baa lagu marshaa, ood dallacantaaye 

- Marna dow la wada qaadayaad, dacas la jiiftaaye 

- Waana shay dabiici ah inaan, laysla degin meele

Fure:

Daahfuran: aqoon leh, cilmi badan

Dowdar: ma shaqayste

Dayradhaaf: dabayl aad u qabow oo xilliga deyrta sii baxayso Soomaaliya ka dhaca