Tani waa gabaygii ugu horreeyay ee noociisa oo kale ah ee laga tiriyo aaladda INTERNET ka iyo

saamaynta uu ku soo kordhiyay nolosha adduunka. Wuxuu yidhi:  

- Intarneedku waa horumaruu, gaadhay aadmigu e

- Aqli iyo garaad baa fikiray, inay abuuraane

- Haddii aan akhbaaraha dhibyari, lagu ekaynaynin

- Adduunyada wax badan oo ka dhaca, lama ogaadeene 

- Asagaad wixii aad rabtaba, u isticmaashaaye

- Qaarbaa iskuullada ka dhigan, meelo ayn arage

- Qaarbaa astaan ganacsi iyo, iib ku baayacane

- Qaar baa waxay ila tahiyo, galiya aaraa'e 

- Qaarbaa in ay madax noqdaan, aawadeed raba e

- Qaarbaa addoomaha ku dhiba, oo anaani ahe

- qaarbaa xadiis ka akhriyiyo, aayadaha diine 

- Qaarbaa khamaar u igmadiyo, maysar oon ku hele

- Qaarbaa iclaan been ah iyo, aafo soo galine

- Qaarbaa abaar kaga digiyo, baas damboo imane 

- Waa ila xareed iyo nimcadii, oo isgarabyaale

- Marna waa ihaaniyo dhib iyo, shay ilwaad darane

- Nin waliba irdaha tuu rabuu, kaga arooraaye 

- Waxaa jira in badan oon aqoon, aaladdaa timide

- Ammuuraha aan sheegiyo halkuu, gabaygu aanaystay

- Dad ninkii ifsaal kale hayoow, soo dir eraygaaga

 Fure:    

igmasho: u isticmaalid

oon: hunguri ama dhaqaale

maysar: khamaar ama turubka 

ihaano: dhibaato

ifsaal: tafaasiil ama micne dheeri ah