|
|
|||||||||||||||||||||||||||||||||||||||||||||||||||||||||||||||||
|
|
Waxay ugu muuqataa inaan dadku isku heer ahayn Talyaani iyo Ingiriis intaanay dalka iman. Waxaa la sarreeya laftiisa kuwa kale ee uu gabaygu dhexmarayna way la hooseeyaan. Wuxuu xusay shaki dhinacoodu qabay oo ahaa inaan Cali Sharmaarke gabaygu afarta meeris ee uu ka kacay lahayn ee uu nin Hunle la odhan jiray u dhiibay oo waa ka leh: Hunle Tanade weeyee hadduu, halal yar kuu dhiibay. Inaan hanbo laga rabin Haameey markii loo loogay iyo inaan nin gob ahi martisoor uu bixiyey hanbo ka sugin, ayuu ku dooday. Wuxuu sheegay in nimankaa gabayga soo dhiibay aanay ahayn niman ceebta iska dhawra. Waxay la tahay in dhaqanka Soomaalidu leeyahay xeer hufan oo haga martida iyo ka loo martiyeyba, xeerkiina uu Harti jabiyey. Wuxuu ku gooyey Haameey bal nala arka intaad Halacda uun haysaan. Wuxuu yidhi:
Dadka Dhabayaco heer lama ahayn, lamana heesayne Markuu Faranji heenseestay buu, soo hanbaabiraye Huurmoodka Deex Bari ka yimid, way hinbaabiciye Hebel magaca ay sheegayaan, uma hagmaayaane Hoggaan diin ah waatii dorraad, loo hanbooriyaye
Dhabayaco hummaag been ah, ways kaga hadaaqaane Saddex hadaloo kugu huursanaa, tan iyo Haabiilba Kolkaad Orobo heegan u tahaad, la hardafaysaane Hunle Tanade weeyee hadduu, halal yar kuu dhiibay Sidii heeshii webigoo kalaan, kuu hafinayaaye
Hal waxaan ka idhi heybta iyo, habarwicii yeedhay Waxaad Koonbe uga haayirteen, Geri halaagiiye Harti goloha kama yeedhi jirin, eegga ka horowe Wixii harag cadcadi suu cabbaar, kuu hawadinaayey Wali Dhabayacooy kaama hadhin, huutinimadiiye Holla xumaddu waa duuggagii, inaad hagaagteene
Halla waxaan ka idhi kii haddeer, hononay ee faaney Hidda boqor ma gaadhide waxyahow, midig ka haaneedi Dhaqankiina hiijada lahaa, ee huqdigu jiifo Iyo higiradiinaa yaree, idin hungaynaysa Hannaankii gun kaa dhigi jiraa, u hardi weynaaye Hiyigaad ku xeertiin sidaan, kuu haraatinayba Gooraad hagaagtiyo ma jirin, haro ku maydhaaye Gobonimada saad jeer habeen, uga huleesheenba Hadda sidii hormuud Kuumadiyo, haybtayada guudba Hulka xeebta idinkoo hundhudha, kuu horjoogsadayba Lama arag habeen uu wanaag, kuu hoyaadtimaye
Halla waxaan ka idhi reer Hartiga, kaba han weyneyne Si’aad noo hareer joogsataan, dhaaxba la helayne Sumuc idinku heeryee Kufriga, loo hishiishiciye Inaad wada hanfadayaal tihiin, maalintuu hubiyo Sida waagii aad naga hadhuu, kuu haraatiyiye Hubka aan tolkay haysaninee, lagu halaagaayo Waxaa nooga hiirtaanyo badan, dood haweysigane Huubooyin buu nagu af-baray, huura-eyluhuye
Halla waxaan ka leeyahay hanbiyo, tii hungurigiiya Marti weelal heemaarsatoo, reer usoo hoyata Dad hanti leh hadhuub caano li’iyo, hoo intuu bixiyo Hibashiyo catow kuma dareen, dhiil la heensadaye Idinkaa hallada ceeba li’yo, hayla qaab darane Tu la hubo habaynkii Jigjiga, xeedhyo hilibaysan Hanbo lagama doonayn sidii, reer hadhuub suge e Waase Dhabayac uur hudhucsan oo, dhabar higaagnaaye Wan habeed leh goortuu liqiyo, fuud hal jaban deeqa Kor u hilatadiisii intuu, hilib kasii buuxsho Baruurtuu hanbaday soo higgoo, haysan kari waaye Hunqaacada kolkuu boodayee, sii hummaagsanayey Hankakoobsiguu fooraree, hogol butaacaayey Hucda iyo hacdii iyo wuxuu, kala hiinraagaayey Hayaay iyo haween soo didiyo, ubad hurdaa toosay Maxaa helay maxaa tallow hayiyo, hadaladii faafay Hoostiina kama dhawrataan, hogaga ceebeede Haddaydaan Hartiba ma aha odhan, hunufka saa yeelay Haameey xaggee jiray intii, Halac la sheegaayey?
Raggii Silsiladdii Haameey/Halac Dheere ku jiray ee Harti jawaab ay ka bixiyeen gabaygan ma arag. Haddii aad hayso noo soo dir. |
|
|||||||||||||||||||||||||||||||||||||||||||||||||||||||||||||||
|
|||||||||||||||||||||||||||||||||||||||||||||||||||||||||||||||||