Gabaygan waxaa curiyay Abwaan Maxamad Cabdiqaadir Daauud [Stanza.]

Taariikgdu markay aheyd July 22, 2003. Waa gabay waddani ah, wuxuuna

taabanayaa dhammaanba dhulka ay dagaan shacabka Soomaaliyeed.

Wuxuuna ka turjummayaa hodonnimada, bilic-samida iyo barwaaqonimada dalka.  Wuxuu yidhi:

1- Daahiroow da'dii gabay dayacay, dabin ma haasaawin

2- Indhaweedba waa kaan ku digan, eenan darandoorin

3- Hayeeshee dammiirkaa i yidhi, Diiriyoow curiye

4- Dubaakhana wuxuu igu dirqiyay, shacabka deeqsiiye

5- Daruur gugacday deyr hoortay iyo, dirir-qayoonaayo

6- Amma danab dabayl iyo hillaac, dul isku saynsaabay

7- Amma roob dufaan culus watoo, dunida maansheeyay

8- Amma doog baxaayiyo sidii, dhado darooreyso

9- Amma daaq indhuhu daawadaan, dihinta ciiddeena

10 Amma ubax dillaaciyo sidii, daran dul caygaagto

11 Ama dahabka ceynkiisa iyo. dayax sagaalaad ah

12 Amma wabi biyaha daacayoo. dan u karaardhaafay

13 Amma darrin barwaaqadu dagtoo, lagu dammaashaado

14 Amma doowlad iyo qaran dastuur, dunidu raacayso

15 Amma daawo lagu diirsadoo, lagu dikaan suulo

16 Gabaygeygu waa door manfacaa, loogu dawgalaye

17 Sidaa iyo darteed dantiyo, adabka daabuula

18 Dulucdiyo u-jeeddada murtida, daymo-harareeyo

19 Dadkayagoo dowgoodii garteen, dacas ma gaareene

20 Aniguna nindoor baan ahaye, dan imma ciisheene

21 Duhur iyo habeen nool qalbiga, imma dillaaceene

22 Gudcur daaha soo rogay hurdadu, igama duusheene

23 Anigooy da'dayduba yartahay, gabay ma duubeene

24 Intaan ciil dibnaha calashadaa, subax ma diideene

25 Kummaan beesha daadihi lahaa, dibad ma meereene

26 Kunna doonta quustiyo kummeey, dageen xeebe

27 Kunna saxaraha dadabka weyn, dugaag kumma casheeyeene

28 Dammiir li'ida dadkeyguu qalbigu, ila dubaaxshaaye

29 Diinaahyada waxaa iigu wacan, diifta iyo ceebta

30 Soomaali wey dammantohoo, maba daliilyooto

31 Waa qoom dammiin wada ohoon, garan dantoodiiye

32 Ma dareemayaan ducfigiyo, doogta nagu taala

33 Dawarsiyo waxey doorbideen, dibad u yaaceede

34 Dalkayagu inuu dadanyahaan, idin dareensiine

35 Dirirdhabo Dannood iyo Hargeelliyo, dagalka Shaygoosh ah

35 Daharriyo Shilaabiyo rugtaa, geela badan daaqo

36 Degin-sammo Afdheer iyo, Dooloow dhinaceeda

37 Docda kala Mandheeriyo halkaa, dheeman lagu duugay

38 Dallahelay Wajeertaa dugsoon, dulucda Mooyaale

39 Halkuu gaalku nagu dilahayee, nagu dabsaaraayo

40 Kummanaan nindoorra ah halkaa, jeelka lagu daayo

41 Darrinkii Marsabid iyo halkey, dammacday laabteydu

42 Siyeeloow dixdeediyo halkuu, dahabku noo yiilay

43 Dooxada Lagdheeraa iyo, wabiga diishiisa

44 Gaarisiyo dalkeygii wacnaa, Laamo dacalkeeda.

45 Jubba labada daanyood halkaa, dooggu darameystay

46 Daafaha Bu’aaliyo halkaa, diinta lagu oogo

46 Daaskii Kismaayiyo illaa, daanka Baladweyne.

47 Amma dooxa Bay iyo Bakool, daginka kheyraadka

48 Daashkeeda Baardheera iyo, dalaska Boosaaso.

49 Dalxiis wacaney Hargeysiyo, tan iyo Daratoole

50 Darrinka Cerigaabo iyo Nugaal, malabka noo daadsan

51 Daawashada u rooneey Goldogob, baladka Daauuska

52 Halkuu farasku noo daaqi jiray, saban daraawiishki

52 Haddana uu tolkeey dagan yehee, dammalku ii yiilo

53 Beerdhigo darkeediyo illaa, Daalo iyo Howdba

54 Ceelbur bal daawadaay, dagin-wanaaggeeda

55 Ku ildoogsadaay Xamar bal dayo, dararta naaskeeda

56 Iyo dacalada dalkoo idil, oonan wada dooxin

57 Dib u milicsadoo wada darsaay, dagalka muuqiisa

58 Dockastaba bal diirdhuuxa, doogga lagu dheehay

59 Dibad iyo kob lagu doorsadaan jirin, deeqa-badanoowe

60 Meel lagu dagaalaba ma aha, doqon unbaa mooge

61 Dareyskeeni weeyaan bilnaa, daa'in abidkiiye

62 Qalbigaygu wuxuu doonayaa, inaad wada dareentaane

63 Halyey gabayga daacaa dacmiya, Deeqa-tima-dheere

64 Duufaan dabayl iyo ma laha, cudurka daacuunka

65 Hooyo weeyo dugsigiisa, waa lagu dakeeyaaye

66 Ka difaaca dulanka-gaaladoo, ceebtana u diida