Jiiftadan waxaa curiyay Abwaan Maxamad Cabdiqaadir Daauud [Stanza] wuxuu tiriyay markey taariikhdu aheyd 16 February 2003.

• Gorgoryahoow lalaayee
• guuraaya leylkiyee
• garbihiisa fidiyoow
• masaafaha gudbaayee
• qaaradaha u gooshoow
• arrin iga gurracantaan
• dooni inaad gargaartood
• shimbiryahoow gorfeysee
• guurtidaada keenoo
• saaxib gacanta ii dhiib
•  
• gayi aan jeclahayoo
• gabiib iyo barwaaqa ah
• oo loogu daw galay
• gaaguuro malabiyo
• moos gacan-muraarya leh
• gallad iyo baraar iyo
• geeda harac ohoo dihin
• adoon igu gaboodfalin
• salaanteyda gaarsii
• gurya-sama wanaagey
• Gaarisaay ma nabad baa?
•  
• Gaarisaay waxaa tahay
• gayi lagu nagaadiyo
• goob loo dalxiistago
• iyo guri dugsoonoo
• geestaan waxgeystiyo
• gasar dhiillo lagu arag
• gacalkuna ku badanyahay
• hooygii waxgaradkee
• Diinta lagu gardaadshaay
• gasariir dhibaatiyo
• gaajo laga daboolaay
• gurya-sama wanaageey
• Gaarisaay ma nabad baa?
•  
• Gibilkeyga oo idil
• gacaltooya aawgeed
• gabbal baad ku leedahay
• garibaxanta naagtiyo
• godadlaha nindoorka ah
• gurigoodi baa tahay
• gabbalkii dhacaayiyo
• waagii guduutaba
• dalag baa kasoo go'a
• ciiddaada garawga ah
• gobolkii dalkeeygaay
• gabayadii waxaa tahay
• gadidda iyo beecee
• gurya-sama wanaageey
• Gaarisaay ma nabad baa?
•  
• Wabigii Ganaaniyo
• gacan waxaad ku taalaa
• gasariir kastoo dhaca
• aan gureynin abidkii
• waxaa gudaha joogaan
• Gareen iyo Garfaad iyo
• nooca Gabaramaanyood
• kalluun gaarba midabkii
• macdan kugu garoodheey
• dadku gacantogleeyaan
• gubba lagu dakeeyiyo
• beertii gobnimadaay
• gurya-sama wanaageey
• Gaarisaay ma nabad baa?
•  
• Gabdha wada xijaabanoo
• Diinta abid gargaaraan
• asluubtooda gaarka ah
• sannada ayna gaarmarin
• oon fircooni loo gudin
• anshax loo gardaadiyoo
• edab lagu guubaabiyey
• sidi Geenya-faraseed
• gaalibaaya socodkoo
• goobaha waxbarashada
• u garbeytammaayaan
• goombaarna la ugu arag
• gurigoodi baa tahay
• gurya-sama wanaageey
• Gaarisaay ma nabad baa?
•  
• Ma-gabada nindoor iyo
• geesi iyo naftiihure
• culimada garrudka ah
• ee Diinta gaacshaan
• fisqigana gummaadaan
• galleef ciraab dheer
• gabyaa laga macaashoo
• guubaabiya tolkoo idil
• gaashaan xornimadoon
• hawraarta gaarka ah
• waligii gorfeeyiyo
• gidaar aan la soo marin
• gurigoodi baa tahay
• gurya-sama wanaageey
• Gaarisaay ma nabad baa?
•  
• Beera wada gingimanoo
• hoobaan gigilayiyo
• gaaheyr shindhalad baxay
• galka faraqa soo daray
• gabbaldaya la daawada
• iyo geedba midabkii
• cirifyada gadaameen
• girgirada dhir kaga xiran
• oon gidir aheynoo
• abuur uu ku gaagixin
• gabiib iyo bacriinba ah
• gabbaanoobin abidkood
• gurigoodi baa tahay
• gurya-sama wanaageey
• Gaarisaay ma nabad baa?
•  
• Garanuugta Garigiyo
• Goodirka iyo Deerada
• geesleey dhammaantood
• iyo Goray-haldhaagii
• Geela iyo Gammaantuba
• goob lagu dhaqaa tahay
• gandi iyo qaniin ma leh
• kuwa garab ku duulaan
• Gorgor iyo Galleyr iyo
• Geeltoosiyiyo Galaw
• Guumeys koleey tahay
• goob laga helaa tahay
• gurya-sama wanaageey
• Gaarisaay ma nabad baa?
•  
• Goolki aayatiinkiyo
• goobtaan higsanayaay
• Igadh aanan gurineey
• guuleyso waligaa
• xarun ganacsi baa tahay
• gurmago'an ha noqon abid
• gacal wada midoobiyo
• gadaalsama Allahayoow
• Guulle waxaan filayaa
• adoo gaar u joogsadoo
• gobolkoo dhan maamula
• gurya-sama wanaageey
• Gaarisaay ma nabad baa?
•  
• Genbi iyo colaad iyo
• gaashaandhig cadawnimo
• saqiirgoowrac iyo ceeb
• iyo gacal dagaalama
• kaa gargaar Allahayoow
• guyaal hore wixii dhacay
• ka gilgila xummaantii
• Rabboow aad garoobeyn
• ama aad golmaran noqon
• gabaadiir abaareed
• gallad iyo wanaag iyo
• gashimeysa waligaa
• gurya-sama wanaageey
• Gaarisaay ma nabad baa?
•  
• Goobyehey gabiibta ah
• yaa goorwalbiyo leyl
• gayigaaga daawada
• oo gees illaa gees
• gaardi socod ku soo mara
• iyo geedda-ka-ciyaar
• galabtii markey tahay
• wabigaa Ganaanee
• galbeed dacalka kaa mara
• oo biyaha gaaciyey
• gugu waa barwaaqee
• goonyahiisa daawadoo
• goombaar lama ammaanee
• yaa gabadh garmaama ah
• Geenya kugu aroosaa
• gurya-sama wanaageey
• Gaarisaay ma nabad baa?