|
The largest
online collection of Somali poetry
Jiiftadan waxaa curiyay Abwaan
Maxamad Cabdiqaadir Daauud [Stanza]
taariikhdu markay ahayd July
21, 2003 asagoo kula hadlayay gabadh ay aad isugu dheeraan jireen muddana
ay sheeka wadaag lahaayeen, balse uu
Aabbaheed nin siiyay.
Ninkaasoo ka yimid dibadda dalka.
Sow kulama dooneyn
inaan deyr-rin-geel-dhalay
xigti kuu dambariyaa
Sow kulama dooneyn
dumar adiga oo qura
inaan daadaheeyaa
Sow kulama dooneyn
inaan dadabgalnaayoon
dammaashaad aroos wacan
dusha ubaxyo kuu suro
Sow kulama dooneyn
inaad Deeqaluul iyo
Daahir ii xambaartaa
Sow kulama dooneyn inaan
guri dugsoon iyo
daarad wada caweynaa
Sow kulama dooneyn
dakharkii sabyaannimo
dib u gocoshadiisii
inaan kaa daryeelaa
Sow kulama dooneyn
illaa duugta ka horoow
inaan kula dakeeyoo
nafta kugu dabraayoon
dugaal kuu ahaadaa
Sow kulama dooneyn
dooxada Lagdheeraa
oo gugu ku da'ayoo
daran lagu kifaaxiyo
dhulka doog ku sarakacay
daacdadana xareeddii
iluhu ay durdurayaan
inaan kula dalxiis tago
Sow kulama dooneyn
dixda geelu daaqiyo
Daadquraan dul iyo Hawd
Daas iyo Harbooliyo
Doolliyo Wardheer iyo
dacalkeeda Dhagaxbuur
dagin-samo Hargeeloo
dirirkii ku daahfuray
duleedkana barwaaqada
indhuhu kugu diraandiri
manka lagu ildoogsada
inaan daawannaa ubax
Sow kulama dooneyn
dagalkeenna hodanka ah
daankii shabeelliyo Jubba
labada doon-raac
dalsankii Buaaliyo
dalka lama huraanka ah
dihintii Kismaayood
inaan kula dagaayoon
daarna kaaga taagaa
Sow kulama dooneyn
daraasiyo tacliin sare
darajiyo wanaag badan
Sow kulama dooneyn
darmaantii haweenkiyo
inaad dowlad noqotaa
Sow kulama dooneyn
dharka caynkaad dammacdiyo
inaan dahabna kuu gadoon
ku dammaanadqaadaa
dar-Allee xannaanada
Sow kulama dooneyn
diiftiyo dhibaatada
iyo daalka hadimada
inaan kaa dabiibaa
Sow kulama dooneyn
inaan wada dabbaanaa
dulucdii kalgacalada
Sow kulama dooneyn
Daa’uus sidiisii
inaan wada daanshaynaa
Sow kulama dooneyn
daafaha adduunyada
inaan wada dubaaxnaa
Sow kulama dooneyn
waagii dillaacaba
inaan kula dardaarmaa
Sow kulama dooneyn
intaan dunida joogeey
dabayluhu i marayaan
ducfi iyo waxyeelliyo
inaadan dacas ku noolaan
Sow kulama dooneyn
dibindaabyo iyo hagar
inaad daa'in ciishoon
Sow kulama dooneyn
murtideyda doorka ah
inaan kuugu dawgalo
Sow kulama dooneyn
dammiirkaagu wuxuu rabo
ama dookhu jecelyahay
inaan baadi-doonaa
Sow kulama dooneyn
inaanan dakano kaa galin
adna aad dammiin noqon
Dad horaan siduu yidhi
waxaa jira nin-door ahooy
dantu ceeb u yeeshee
waxaa taa daliil u ah
markaan yara dalleensamee
dabayluhu i liicsheen
ama aan danteenniyo
aayaheenna daahsoon
dibad ugu socdaal tagay
inaan doona inanyahay
nolal tani ka doorroon
Aabbahaa nin kugu daray
adna diiday aad oran
Diricnimo garaad sare
dabci igama fiicnee
waxaa laabta kuu dagay
doolar baa wax kuu tari
Balse waad ilduuftoo
wacadkina duleed baad
dugaag oogu loogtee
marna degin ma dheeride
dummaashiyey nasiibkaa
|