-
Walaal Maxamadoow iga yaroow,
maqal dabaaubteyda
-
Oo murtideyda hoo adaan, kuu
milmilayaaye
-
Oo sidaan kuu mihiinsiiyey,
uga muraad yeelo
-
Oo ku maqsuud ninyahoow,
miraha dhuuxooda
-
Oo haka maagan waligaa,
muallif xeeldheere
-
-
Inaad mehersataa naag
maalintey, kula macaanaato
-
Ama maanka guur kaa galood,
muxubbo daansheyso
-
Waa ineyan minjuhu miiq
aheyn, moxoggu dhuubnaado
-
Waa iney miskaha kala fidaan,
muuqa iyo joogga
-
Waa iney mataantiyo gacmaha,
midig ka laafyooto
-
Waa iney magaadhadu aheyn,
masaf sideediiye
-
Waa iney timmuhu mayracdaan,
moxogga hoostiisa
-
Waa iney milicda eegmada,
maandhoow kugu deeqda
-
Waa iney mid shuluq iyo
aheyn, caato millay liicsho
-
Waa iney mid dheeroo aheyn,
mitiro sii dhaaftay
-
Waa iney itaal meeldhaxa
tohoo, midabku nuuraayo
-
Ama ay maariin-dhalaal tahay,
mayayga dheehiisa
-
Waa iney Meedhafiin marsanin,
meelo u casaanin
-
Oy midab gaboodda ah laheyn
iyo, baro ka muuqmuqda
-
Waa iney mug iyo cuf
leedahooy, meel walba u buuxda
-
Waa iney muxaafidad tohooy,
diinta muxubbeyso
-
Waa iney musxafkii
xambaartooy, meelna kaga leexan
-
Waa iney socodka
miidaamisooy, dabada meermeerin
-
Waa iney minkoodii ka
taginoow, suuqa meereysan
-
Waa iney maryaha culus
qabtooy, naaska kuu muujin
-
Waa iney muraaqabad ku tahay,
meelkastooy joogto
-
Waa iney marjo iyo aheyn,
mooska bololaaya
-
Waa iney milgo iyo leedahay,
muuno lagu raaco
-
Waa iney macruuf kugu tohood,
garan milaadkeeda
-
Waa iney mandarad nuuri
tohooy, marada geyngeymin
-
Waa iney muftiyo reer
dhalaan, madaxdhig beeleed ah
-
Waa iney muxaajabad tohoon,
laisku maandhaafin
-
Waa iney malaayuun habla ah,
magac ku dheeraato
-
Waa ineysan maangaab aheyn,
maqano aan joogin
-
Waa iney maseereey aheyn,
miri naftaadiiba
-
Waa iney martida sooriyooy,
gacalka muuneyso
-
Haweenna mag iyo magac ka
siman, muuqa abidkoode
-
Waa iney malcuun iyo aheyn,
murugo soo taagan
-
Waa iney macaan hooyadeed,
mansab la ekeyso
-
Waa iney mucaashaqad tohooy,
kula maaweeloota
-
Waa iney marwo sharaf leh
tohooy, maanka kuu deeqdo
-
Markaad la mingaleysiyo
markaad, maalka dhiibeyso
-
Iyo maalintaad mehersaneed,
maanka u bareerto
-
Waa iney mashaayiiq reer
tolkaa, madasha joogaane
-
Intaasoo murti ah wixii,
hadal muggiis ah
-
Madhaafaanka sheekada iyo,
muhandiseynteeda
-
Iyo wali makaab kaan ku
xiray, murabaceynteeda
-
Waa muxubbadaan kuu qabiyo,
meeshaad iga joogta
-
-
Mataankii nafteydaa tihiyo,
ila min-jiifkiiye
-
Mahuraan walaal baa tohoo,
maanku goconaayo
-
Gacanteydi midig baa tihiyo,
madaxdhiggeygiiye
-
Rabboow aanan maqlin
geeridaa, maanta iyo jeer dhaw
-
Rabboow Maxamadoow guul ku
sii, muuno iyo reer san
-
Marwo sharaf leh Eebboow ku
sii, ubad macaash yeesha
-
Mansilkaaga Eebboow uu,
gacalku muuneeyo
-
Oo ay martidu soo dagtoo,
diinta lagu muujo
-
Oo maalin iyo habeen intaba,
lagu maaweeloodo
-
Kolley mowdku nama seegayoo,
maalin buu imane
-
Marka ay middaadii gashe,e
lagu mihiinsiiyo
-
Jannadii macaaneed Rabboow,
midig laguu saaro
