The largest online collection of Somali poetry

 Maxamad Cabdiqaadir Daauud [Stanza] wuxuu heestan curiyay September 20, 1999. Waana hees daadis ah. La qabso.  Wuxuu yidhi: 

 

·        Baryahaan haweenkaba

·        ballan nama dhaxtaaloo

·        waan kala baqoolnaa

·        bas baan idhi jacaylkii

·        iyo barashadoodii

·        kuuma baahni inanyahay

·        waxaad iila bilic tahay

·        bakhtigooda xoolaha

·        ku bidhaanshay gabadhyahay

·        dumar baabka aa tahay

·        bil horaan ogaadoon

·        ka baaraandagoo nacay

·        beerjileeci mahayoo

·        buseylkii kalgacalkana

·        ka balfiyay nafteydoo

·        sammahiina baayacay

·        barri, maanta iyo shalay

·        iyo bila damboo maqan

·        batarkiyo caweyskiyo

·        bandhiggiyo cayaaraha

·        inaan wada barjeeynaa

·        baacuggaaga yey galin

·        beerlaxawsigaagana

·        ku badbaadi meysidoo

·        bari hore ninkaa tagay

·        ragga laguma buuqee

·        Billaahiye ka waajee

·        baroortaada ila dhaaf

 

·        Baxsigaan sammeeyiyo

·        baaritaanadeeydii

·        bayaankii siduu yidhi

·        basariyo waxaa tahay

·        baali laga hayaamoo

·        bidhaan aragtidaadeey

·        indhuhu igu bukoodaan

·        baysaaniga hablaha kacay

·        baladkeenna joogaan

·        kummaan kaa bidhaan wacan

·        oo wada bulshaawi ah

·        baxaaliga qureesh iyo

·        baatir aragtideeda leh

·        raggu baadigooboo

·        bureeqooy la leeyahay

·        ayaan barashadoodii

·        beylahoon huruufoon

·        bayaxoon ku dhaafee

·        adoo bahalhiglaha iyo

·        bah-dugaagta shaaboho

·        horta yaa i kaa baray?

 

·        Badoow lama jeclaadoo

·        looma beernuglaadoo

·        ballan wacad Ilaaheey

·        tii loogu bogi jiree

·        ee baxnaanisaayee

·        baanataana ma ihidee

·        bihaanbihiska beenta ah

·        boqonta ha igu heerine

·        Billaahiye ka waajee

·        baroortaada ila dhaaf

 

·        Bahal kuuma loogeen

·        baahida kalgacalkana

·        Baxsan kuguma dhaafeen

·        jacayl waa balaayoo

·        bukaan halis ah weeyee

·        kuuma beyleheen cadaw

·        bayuur kuma iraahdeen

·        haddaad tahay mid baari ah

·        bidhaan iyo asluubba leh

·        baraaraha timmaha higil

·        baroor midab Gammaan iyo

·        Baqalkiyo Fardaha qaar

·        Biciid eegmadiisa leh

·        bilnaan loogu dawgalay

·        inkastood bastaa tahay

·        bilaash kuuma diidine

·        Baxsan adiga kheyrkaa

·        iyo boqol kaloo yidhi

·        iney ii bukoodeen

·        bari kala ahaanoo

·        haweenkaba ma beegsadoo

·        lamma baaramee garoo

·        jacaylkana bir iyo dhagax

·        biyo-kulul isaga meyr

·        Billaahiye ka waajee

·        baroortaada ila dhaaf

 

·        Inaa tahay mid badhan baan

·        inanyahay buruufoo

·        baaxadsoorahaan tagoon

·        ku ballaarshay milicdii

·        naxariis barkaaga ah

·        Billee igama dhaadhicin

·        bagaan hadalka kuu idhi

·        waana siduu u soo baxay

·        baajin iyo ka noqod ma leh

·        balaliyo turaal ma leh

·        barqinkiyo habeenkii

·        waa adigan basaasee

·        birmanaaya waa nool

·        boholyoow ku daashadee

·        baafineysa inanyahay

·        barti aan caweeyoon

·        ku bariista bari qura

·        bakaalkiyo dusaaguna

·        kugu waabariistaan

·        ood isbeegsataanood

·        ku barooraneeysee

·        ha iga sugin baraar iyo

·        bari-sammo ayaan wacan

·        inaan baaq dhambaalada

·        Baxsan kaa aqbala oon

·        bogga kuu salaaxaa

·        Billaahiye ka waajee

·        baroortaada ila dhaaf