Geelii Indha-Badane iyo jabkii Ogaadeen u gaystay Isaaq iyo gabaygii Maxamuud Cali Beenaleey ee digashada iyo goodiska ahaa oo wada socda ayaa loo geeyay Cabdi Gahaydh.  Isagoo haddaba Isaaqu ka filayo inuu dhiiri-galiyo oo uu dagaalansiiyo ayuu tiriyey gabaygan calaacalka iyo marag-furka isagu jira.  Gabaygu wuu dheeraa intan unbaanse hadda ka haynaa.  Wuxuu yidhi

• Dhiilaabayey xalay miyaan, dhagidi soo booday

• Ma dhabeyti dhawr baan hurdada, dhinacyaduu diiday

• Gogoshii la ii dhigay miyaan, dhan isu weydaarshay

• Sidii qalanjo dhaawacan miyaan, dhiraha laynaayey

• Sidii naag ninkeedii dhintoo reer, ka dhaxal meertay

• Ma dhulkaan shan baac qoday, Cabdow dhalasho waa yaabe

•  

• Ma dheg xumada Kiinguna maqlaa, dhibaya jiidhkayga

• Dhanuu jiraba Daarood miyaa, dhool ku wada faanay

• Dhabayaciyo Reer Dalal miyaa, dhaanto laga keenay

• Ma raggaanu dhaxirka u xidhnaa, dhudi ku geeraarey

• Ma dhawaaqa Cali soo diraa, waliba dheerada

• Waa taynu dhaabaha lahayn, labada dhoomoode

• Lama dhaco anaga reerkayaga, sida dhukaameede

• Ama geelu seymuu u dhashaye, dhaqashadii daaya

• Ama dhiciya sida reer tolkay, dhudi ma meerteene

• Ama dhoofa waad taad sidii, dhalo nugleydeene