1.      Hammigeygu meel buu rabaa, inuu ku haadaaye

2.      Hadimiyo dhibaataan arkaa inay na heystaane

3.      Hawraarta gabay waanigii, hoodo ku lahaaye

4.      An hitiqiyo maansada kolbay, haadda soo qabane

5.      Hogaamiyaha kooxdee na yiri, howsha igu daaya

6.      Hadal kii ka keenana darbada, hanaqa jeexaaya

7.      Haybna kula wadaagoo jifada, hoose kula sheegta

8.      Inaad horumar gaartana an rabin, hiilkastoo aad siiso

9.      Hohe saw ma garataan dadow, gacanta hooseysa?

10.  Hooyadiis ninkii jiidayaa, hooy san kuma geeyo

11.  Nin cadceed ka hiinraagayaa, harac kumuu joojo

12.  Halbowlaha ninkii kaala baxay, hogosha jiilaalka

13.  Halyeey inaad ku sheegtaan marnaba, kuma habbooneyne

14.  Hohe saw ma garataan dadow, gacanta hooseysa?

15.  Habeen iyo dharaar dawladdaan, hawsha qabanaysa

16.  Hogaamiyha kooxdee utaga, heegan galineysa

17.  Hubka uun ku soortee dhammaan, hoobiyaha siisa

18.  Halka lagu gubaayaana tahay, hoyga ehelkiisa

19.  Hohe saw ma garataan dadow, gacanta hooseysa?

20.  Hadba shirarka loo qabanayee, nabadna soo hoynin

21.  Haddii laba heshiis wada gashana, laga hinaasaayo

22.  Handadaada hoosee qarsoon, hadal i haaneedka

23.  Hadal kii ku celiyana xabsiga, lagu halgaadaayo

24.  Ama hawsha laga qaadayee, mid kale loo hogaan barayo

25.  Hohe saw ma aragtaan dadow, gacanta hooseysa?

26.  Afartaas halkii aan larabay, iyo hilin ma qaadsiiyey

27.  Halhaleelku hadal kuma wacnee, haybad ma usheegay

28.  Sidii hogasha roobkoo da'daan, kaaga haqabtiriye

29.  Afar kalana waa midaan hubee, hoosta ka xarriiqa

30.  Hawiye iyo Daarood iyo intii, heedhe la halmaasha

31.  Haddii aan haddeer lays cafiyin, oon hoyga la islaaxin

32.  Hudhudkiyo haddaan layska qaban, nacaska heeryeysan

33.  Hagar li'i haddaan loo maslixin, kii kankale hiifay

34.  Hoogayeey hadhow yaan la oran, hadal shalaytiine

35.  Hawadeenna Nairoobibaa , laga hagaayaaye

36.  Maraakiibta hogan ee badaha, heeganka u joogta

37.  Hadafkiyo ujeedada ku jira, heedhe ma arkaane

38.  Hadhow bay ka sheekayn makriga, haatan la macaane

39.  Hootada waxaa loo sitaa, hanadadiiniiye

40.  Hanaqiyo markay kugu dhuftaan, araxda hoosteeda

41.  Hannaan dawladnimo ay luntee, gobolba hayb sheegto

42.  Hoogayeey hadhow yaa la oran, iyo hadal shaleytiine

43.  Wixii laysku heystaba wakaas, haadda loo waraye

44.  Hoosba looma eegine qarnaa, dibu hayaanteene

45.  Hummaag been ah baad dabagasheen, haatuf aan jirine

46.  Habqankiinnii waa kaas u galay, halaq abeesaaye

47.  Haddii haybtu ay saro martoo, qaranku hoos aaday

48.  Hiddo iyo haddii laga tagoo, diinta la hilmaamay

49.  Halaag adinku aad sababsateen, hilinki weeyaane

50.  Hadmaan garan masiibada annagu, gacanta aan heyno

51.  Hadmuu geesi naga mida u kicin, haybna la illaawin

52.  Hohe qaranku goormuu ka bixi, hagarta jiilkeenna?

53.  Afartaas halkii aan larabay, iyo hilin ma qaadsiiyey

54.  Halhaleelku hadal kuma wacnee, haybad ma usheegay

55.  Sidii hogasha roobkoo da'daan, kaaga haqabtiriye

56.  Afar kalana waa midaan hubee, hoosta ka xarriiqa

57.  Hargeysiyo Barbara waa kuwaas, haatan sii go' aye

58.  Hammigoodu wuxuu yahay inay, naga hayamaane

59.  Hareeraha Nugaaleed Qardhiyo, hawdka Buuhoodle

60.  Hawluhu waxay uga socdaan, sida Hargeysaade

61.  Hiiraan haddaa laga wadaa, hawl abaabulahe

62.  Hadafkuna ma aha wadajiriyo, qaran la soo hooyo

63.  Halkii Baydhababa lagu furaa, la higsanaayaaye

64.  Hadalada kasoo yeerayaa, Sheebeelada hoose

65.  Hindisaha ku hoosjira ma aha, hiil walaalnimo e

66.  Hugunkiyo madaafiicda Xamar, wada hareeraysay

67.  Kismaayada Nasiibka uheshee, dhiilada u heelan

68.  Garbahaaray Baladxaawo iyo, Luuqda hoganeysa

69.  Halkii aan jalleecaba nabsaa, haan la dhaansadaye

70.  Hohe qaranku goormuu ka bixi, hagarta jiilkeenna?

71.  Afartaas halkii aan larabay, iyo hilin ma qaadsiiyey

72.  Halhaleelku hadal kuma wacnee, haybad ma usheegay

73.  Sidii hogasha roobkoo da'daan, kaaga haqabtiriye

74.  Afar kalana waa midaan hubee, hoosta ka xarriiqa

75.  Halkii aan heshiis dhawrayiyo, agab la soo hooyo

76.  Haaraha nabraha baan lahaa, haatan bay dhayiye

77.  Habarwacasho qaran baan lahaa, hiil ayaa imane

78.  Huwan maro qabiil loo gashaad, heegan galiseene

79.  Hambo niman reebayninbaa, haabtay salabkiiye

80.  Hididiilihii aan qabaa, hoos usii dhacaye

81.  Hohe qaranku goormuu ka bixi hagarta jiilkeenna?

82.  Halkii aan muwaafaqo lahaa, haatan bay imane

83.  Haybtiyo qabiil dhaawicii, haatan la ogaaye

84.  Dakadaha la haystaan lahaa, dawlad baa hanane

85.  Hurgun kale miyaa soo noqdoo, haatan nagu faafay

86.  Dogob hoos ka noolaa miyaa, haatan holac keenay

87.  Hididiilihii aan qabaa, hoos usii dhacaye

88.  Hohe qaranku goormuu ka bixi hagarta jiilkeenna?

89.  Halkii aan lahaa eedahaa, loo hannaan dayiye

90.  Hantidiyo waxaa laysu celin, maal lakala haysto

91.  Hagardaamadaa layska dayn, hayb wax lagu maago

92.  Anaa kaa hub badan baan lahaa, waa horey hariye

93.  Hayeeshee hannaankaan arkaa, hawl kaluu dhalaye

94.  Hididiiladii aan qabaa, hoos usii dhacaye

95.  Hohe qaranku goormuu ka bixi hagarta jiilkeenna?

96.  Afartaas halkii aan larabay, iyo hilin ma qaadsiiyey

97.  Halhaleelku hadal kuma wacnee, haybad ma usheegay

98.  Sidii hogasha roobkoo da'daan, kaaga haqabtiriye

99.  Afar kalana waa midaan hubee, hoosta ka xarriiqa

100.     Hankii lagu aqoon jiray tolkeen, maanta mahayaane

101.     Hablaheena inuu gaal kufsado, hohe madhawrayne

102.     Hambalyada inaan ugu darnaa, kii na halakeeyey

103.     Horay waxaan u dhicin baa imaan, haatan dabadeede

104.     Hilibkoon lakarin inaan cunnaa, waa hal la arkaaye

105.     Heeryada gumeysiga ninkii, heedhe garanaaya

106.     Ninkii halo uu leeyahay Amxaar, hawl li'i u qaatay

107.     Ama hooyadiis uu kufrigu, hoosta ka dharbaaxay

108.     Marna uma hawoodeen inuu Amxaar, hiil u raadsado e

109.     Hungo maran maxaa idinka dhigay, cadowga hoos jooga?

110.     Haddii gaal hujuum kuugu yimid, hooy la oran waayey

111.     Hal Amxaar ah oo qori wataa, nagu humbaaleeyey

112.     Hadal li'i masaajidda ugalay, oo hoos lawada eegay

113.     Horay waxaan u dhicin baa imaan haatan dabadeede

114.     Hilibkoon lakarin inaan cunnaa, waa hal la arkaaye

115.     Haweenkana markuu naga furtoo, laadka nagu hoobsho

116.     Himbiriirsi oohina markaan, ciil iswada hiifno

117.     Harjadkuna kolkaa naga madhoo, cadaw na heeryeysto

118.     Haddeer waxaan ku dheeldheelley baan, laguba hawshoone

119.     Halgan dheer mar kale aan galnee, haatan aan isdhiibno

120.     Afartaas halkii aan larabay, iyo hilin ma qaadsiiyey

121.     Halhaleelku hadal kuma wacnee, haybad ma usheegay

122.     Sidii hogasha roobkoo da'daan, kaaga haqabtiriye

123.     Afar kalana waa midaan hubee, hoosta ka xarriiqa

124.     Anuun baan hareynine, dadkaan hoogga lala maagye

125.     Hoos iyo kor baan ugu ceshaye, waanan huraheyne

126.     Hadal kuma khasaarsheen haddaan, hooyaday dihane

127.     Hilib igu yaallaan go'ine, duulku waa hamage

128.     Hadmay garan waxaan aan haddeer, jiifka holin waayey?

129.     Hadmay garan in duul wadajiraa, horumar uu gaaro

130.     Hog walaalkiis ruuxii qodaa, waa halaag culuse

131.     Hadmay garan nin ani kaligi yiri, hiil walaal lumiye?

132.     Hagardaamo ruuxii kunnool, meel xun buu hoyane

133.     Hadmay garan musiibada, dhammaan wada hareeraysay?

134.     Hadmay garan kabxume ma uu haree, waa kab laawaha e?

135.     Hadmay garan gacmahoo laysla helo, hawshu waa sahale?

136.     Hoggaankiyo hadmaa lagu heshiin, kuwa hareer jooga

137.     Hororsiga waxaa noogu wacan, hoobso waa dherege

138.     Haddii lala xisaabtamo, kursiga kuma haliileene

139.     Hadmay garan mas'uuliyaddu waa, hawsha ugu weyne?

140.     Anuun baa harraadiye tolkay waa horuu haraye

141.     Hunuf ina Tigreeyey dhammaan, hadal kaqaataane

142.     Haddii ay dadnimo leeyihiin, ma u haweysteene

143.     Hub intuu u qeybiyo dhammaan, harac ma seexdeene

144.     Hungo maran inay wada yihiin madaxu hooseeyo

145.     Iyo inay halyeey leeyihiin, haatan baan sugiye.