Wuxuu yidhi Makayte:

• Indhawayd ha kama aanan tirin, hooyalaay gabaye

• Ma habaynin maansooyinkii, ugu haboonaaye

• Hurdiyo jiifna kama dooran iyo, shax iyo huuhaaye

• Hubsiinaan ku jiray meeshiyo, hogashii Deyreede

• Hugta iyo higtii iyo markay, hiririgtii yeedhay
• Agow kama hadhine guushanaan, sugayey Heyboow e

• Ma halmaamin Hoodow sidaad, iila hadasheene
• Tixdaad hore u fileyseen hadday, ii haboon tahay
• Sidii aar intuu hayba dilay, laabta ka higgooday
• Hinfidhka iyo reenka iga bixi, fulaygu hayn waaye
• Hubkaan tuurayaa waa gantaal, cadow ku hoobtaaye
• Waa hola hanfiyo waa dabayl, Hoobiyoo kale e
• Sina ugama hibaysan karo, hoori soo ciyeye
• Hal-abuurka geeraar haddaan, hogo tusaaleeyo
• Haramaanyo beertaba haddaan, daaqa laga haamin
• Hagaag uma baxdoo waxaa la hadhaha, geedka hoos gale
• Suugaantuna habkay leedahay baa, loo hawadiyaaye
• Sidii nimaan habayn hore maqloo, hoobaale ku hadaaqay
• Layskama hantaataco, sidii hiliblihii jaane

• Walba anigu haadaa dhac iyo, hawti ma aqaane
• Mawjadaha hoosiyo dhexiyo, heer saraa jira e
• War waa hirarka dhaadheer kuwaan, ka hadli doonaaye

• Hakadkiyo haddaan seetadiyo, heegii jarayaaye
• Sidii samo hilaacdiyo cirkoo, hogol daruureeyey
• Oo heegadu sii dhaaftayoo, hibitiqlaynaaya
• Hanqadhkiyo haddaan hoorimaad, haw lasoo idhiye
• Maantayna hareerna u baxayn, Habar Magaadlaye
• Kol haddii hamigii Ciidagale, haystay lagu beenshey
• ,,,,,,, gabay ah waa inaan tirshoon, hadiyad geeyaaye
• Iga hooya caawoo kaluu, haybad leeyahaye

• Afartaa ha’iyo waw kordhaban, hilin ma qaadsiiyey
• Halhalowga iiguma baxdee, ma u halaanbeeyay
• Hanaankii Qamaan iyo siddii, hebelo maw sheegay
• Heleeleey haddeer iyo waqtiga, haatan waxa jooga
• Bal aan idinku haasiwiyee, dhagaha hoogaansha

• Warka Hara Digeed iyo ka yimid, hogodkii Gaaroodi
• Ee haatufkiyo ii waramay, haadka lalayaayi
• Ee xalay habeenkoo badh tegay, laygu soo hoyiyey
• Ee hiijadii aan qabiyo, hiiftii iga reebay
• Ee hubanti loo sheegay ee, heerka sare gaadhay
• Ee hogoshkii Iidoor ahaa, haanka lagu gooyey
• Ee hooriflihii oomanaa, hoognay kaga siiyey
• Warka la hufay ee haadsan, een helay ninkii keenay
• Wax la hubo inuu yahay markuu, igula haasaaway
• Hanbalyaan u diray Reer Isaaq, hadiyad waayeele

• Allaylehe habkii aan la rabay, waw hawadiyeene
• Allaylehe inay hawl la rabay, noo hirgaliyeene
• Allaylehe hanna lama rabee, heer libaax gala e??
• Allaylehe horseed bay noqdeen, hanadadaydiiye
• Allaylehe hantiye Goosaygay, hor u lahaayeene
• Allaylehe horweynkiyo ku dhece, halab irmaanayde
• Allaylehe haleeladii dhashaa, haama loo culaye
• Allaylehe kuwii hor u lahaa, haatan laga qaadye
• Dagaallaguma horjoogsan karo, labada haaroode
• Allaylehe mid lagu hoobtay bay, ku hidiwaaleene

• Hujuun iyo kolkay weerar iyo, kala hufaay gaadho
• Abidkoo qabiil ay heleen, dib uma heelayne
• Hiddiyo dhaqanba waa loo yaqaan, haybka aan nahaye
• Horraysiyo dhacdaba goob dagaal, kuma hungoobaane
• Allaylehe hammigii Ciidagale, haystay been noqoye

• Afartaa ha’iyo waw kordhaban, hilin ma qaadsiiyey
• Halhalowga iiguma baxdee, ma u halaanbeeyay
• Hanaankii Qamaan iyo siddii, hebelo maw sheegay
• Heleeleey haddeer iyo waqtiga, haatan waxa jooga
• Bal aan idinku haasiwiyee, dhagaha hoogaansha

• Cabdi Ciisihii heesi jiray, heybadiyo faanka
• Tacshiirtii horree la huwiyeey, kala halaabeene
• Baasuukihii hamug ku yidhi, heey ka wada tuurye
• Hog dhurwaa nafbaa tii badeey, kaga huleeleene??
• Ciidgalaha hoos uga yar bay, u hanqal taagaane
• Hanjabaad wax kaga qaadayaan, kuna huruufaane
• Haddaan ka hor nimaad waxay noqdaan, haydhaf taag darane

• Hangal bay xidheen naagihii, horinta Guuyoowe
• Huqdi iyo calool xumo u dhimay, baaqigaw hadhaye
• Horaa loo gumaystaye maxaa, halista keenaayey

• Nin halkaa ……… iyo, wiil u hanaqaada???????
• Halyeygiyo waxaa geesigiyo, hanadadaw diiday
• Cabdi Ciise unbaa handaday, oo halkaas dhigaye
• Wankii lagu hor gawracay, ninkii hoosta ka xariiqay
• Ee yidhi kan haysoo mid kale, hore usoo qaada
• Ee sooryadoodii hufnayd, hilib carooleeyey
• Siday maanta ugu hiiliyeen, waa habnaba seege!

• Hulunbaaga baa hadamasha iyo, huubadii ururtay??
• Hadhcad maalintii laysku riday, hollaca Aakeega
• Halhayskoodu waa kuu ahaa, dee hayaay jabaye
• Miyaan kaga hadhaayaa barraan, heego soo kicine

• Gaashaanbuurtii way kala hadfeen, waana kala haybe
• Hareeraha markii laga maree, hugun ku soo beegmay
• Siddii Kadaf hoggii waayey bay, u hanqaraafeene
• Huyucsane hadh joogsaa la yidhi, higil jabkoodiiye
• Miyaan kaga hadhaayaa barraan, heego soo kicine

• Hala waxaan u diray Reer Gobdoon, hoog Allow dayaye
• Heer foolxun bay soo mareen, oo hanaan darane
• Humaatiyo dhibaatay qabeen, hoos-ka-tuur badane
• Anigoon hafrayn Ina Gahayr, hadaladuu sheegay
• Hilayga iyo markuu heeryadiyo, haamo idin saaray
• Horweynkiyo irmaankiyo markuu, halihii kaa qaatay
• Higladii balaadh iyo bankaad, uga hayaanteene

• Haddaba ma joogteene waad, hoyan lahaydeene
• Hanfafkiiba kama aad bogsoon, boogihii hore e
• Hanabadiyo agoontii maxaa, hadiyo kaa geeyay?
• Hadaladii Gahaydh iyo maxaad, hawshii ku ilowday?

• Afartaa ha’iyo waw kordhaban, hilin ma qaadsiiyey
• Halhalowga iiguma baxdee, ma u halaanbeeyay
• Hanaankii Qamaan iyo siddii, hebelo maw sheegay
• Heleeleey haddeer iyo waqtiga, haatan waxa jooga
• Bal aan idinku haasiwiyee, dhagaha hoogaansha

• Walow hadafkii guud ee burburay, lagu heshiis qaatay
• Oon hoos dhaqaalaha ognahay, heerka bixinaaya
• Bal haddana hubsiinaa la yidhi, hal iyo neefsiiye
• Heeriga Isaaq waa inaan, kala hanbeeyaaye

• Habar Awasha iyo Arabba ways, hilib naqaanaaye
• Hawaar iyo huruuf nama dhex yaal, oo kalgacal waysu hugunaaye
• Haweenkiyo safraha kama dhacaan, halabadoodiiye
• Hillimada intay joogsadaan, ma harkawaaxaane
• Huudheeda iyo dharkii kama furtaan, hooyo socotayne
• Habwanaagsan bay ula dhaqmaan, ruux hoyaatin ahe
• Iyaguna hadday ka cabayaan, horadii Ooyoode
• Oo ay heeshigii Bulaaliyo nimcadii, ka hirqanaayaane
• Ninna ma hungureeyoo ma dhaco, maganta hoostaale
• Heshiis baan ku nahay nabadda guud, labada haamoode

• Huuhaadan Reer Ciidgale waa, huf iyo beene
• Sidiinaba hunguri waalan iyo, hadadaf mooyaane
• Hayaay qaylo buuq iyo nacaad, huriso mooyaane
• Harkaha iibintoodiyo dilaal, habacsan mooyaane
• Hilib inaad qashaan iyo, huteel karintii mooyaane
• Habla siisayaa iyo si kale, ula heshiisaaba
• Amxaarada inaad hoos gashaan, hanaqa mooyaane
• Hanaan gobonimiyo sharafba, waad ka hiddo guurteene

• Bal waayahay adunbaa ku hadhay, meel habaas badane
• Hungurigu wad ma arkaa la yidhi, haddimo mooyaane
• Habar Yoonis iyo Habar Jeclaa, hoday naftiiniiye
• Iyaba guul ma haysanee aday, ku hadidaayeene
• Haye unbaad tidhaahdeen waxbaa, la iska hubiyaaye
• Hogbay kugu tuureen libaax, soo hamaamsadaye

• Wax idiin hantiya waa caqligii, hoos u fooraraye
• Waa kaad Bullaalaan ku hori, ku hamiyeyseene
• Idinkoo higaariyo dhibkiyo, hilaygii soo qaatay
• Waa taad harada soo degteen, goor habaynimo e
• Hab wanaagsan Reer Fiqi Cigaal, holoc ku leefsiiye

• Reer Cumar qudhaad ku hafateen, kuna hungowdeene
• Haweenkaba qaar sida hubkay, kaala hadhayeene
• Wacaysbaa ku heemaarsadayoo, haadda kuu wadhaye
• Hoobiyaha Bahaa kaaga riday, meel hareerta ahe
• Hayrabkiyo markii Faysalkii, huray lasoo dhaafo
• Ee Caliyo Haaruunba yimid, hoorin mahaysaane
• Haad baad rabteen inaad biyaha, ka haqab beeshaane
• Herdi kulul markii Reer Isaaq, hoosta kuu galiyey
• Idinkoo hamuuntii qabaad, ka hududuusheene

• Dhaawaca halkaad kaga tagteen, holoqii baa yaale
• Halac Dheere sarartiisii buu, Dacawgu hiigaaye
• Hororkiyo Waraabuhu ka dhereg, hilib rag waaweyne

• War taariikhdu waa huban haddii, aan cidi hilmaamayne
• Hud-hudka iyo beenaalihii Qadar, kasoo heesay
• Hargayseey baqihii reer tolkaa, horay u dhaafeen dheh

• Heyhaata waa kii ku lumay, habaqlihiinii dheh
• Is haaraamis baad goor la jabay, dib isu hiifteen dheh
• Habarwacasho nabar kugu dhacaa, kaaga hadhi waa dheh
• In kastooy halaagmeen kuwii, had iyo mowd keenay
• Oo ay habraha oohintii, hibitiqlaynayso
• Wali heerkii aan rabay waxbaa, kaaga sii hadhay dheh
• Hoorimaad yar baa idinku helay, meel hadoodila ahe
• Heelkii Nogbeed iyo Godey, Herer kuwii yaalay
• Ama NFD ku hadhsanaa, amase Haadaamo
• Halooyo taarkaan u diray, haatan wada gaadhye
• Ogaadeen Hundiyo Faafan iyo, Hilo kasoo guurye
• Hilaac la mood wakaa soo socdoo, la is hortaagayne??
• Lafaruug habkaad ugu jabteen, halisba ma ahayne
• Maantaynaan hareerna u baxayn, Reer Hugaadhsane e
• Nabad uu hogaankeedii go’ay, haw hiloobina e!
• Heshiis hayga filan inaan, colaad huriyo mooyaane