Gabayadii silsiladda ahaa ee Maalin-guur iyo Reer Warfaa dhexmaray ayuu gabaygani ka mid yahay.  Gabay kale oo hal xidhaale ah oo nin  Maalin-guur ahi soo diray ayuuna daba socday.  Haddii aad hayso gabaygaa kale nala soo xidhiidh.  Wuxuu yidhi:

-	Kun nin oo kabaalaha col iyo,  dirir u kooraysa

-	Oo kuhaan iyo fal iyo sixir, kalkaalaayo

-	Oo kow meel joogta, kali wax iska taraynin

-  	Car haddaad kasmada sheekh ku tahay, celi kalaankeeda?

-	Kol wax booda koox ugu badshoon, cago ku kaynaanin

-	Oon dherer kiintaal dhanayn, lugana kaabaynin 

-	Car haddaad kasmada sheekh ku tahay, celi kalaamkeeda?

-	Nin salaad u kacay oo sujuud, kaamilnimo yeelay

-  	Oo kufaarnimo wuxuu kaqabo, diintu kohanayso

-  	Car haddaad kasmada sheekh ku tahay, celi kalaamkeeda?

-	Koor wayne geel iyo horwayn, kadimo loo ooday

-  	Oo baayaca laysugu kacshoo, kii lahaa wariyey

-  	Oon kobac riyood iyo sabeen, kodane goynaynin

-  	Car haddaad kasmada sheekh ku tahay, celi kalaamkeeda?

-	Karuur iyo karuur iyo, kar iyo qaar raacsan??

-  	Kafka waxaan dhanayn ood adduun, kun iyo daar siisan

-  	Car haddaad kasmada sheekh ku tahay, celi kalaamkeeda?

-  	Wabigoo karkaaradii jabshoo, kaliyadii buuxshay

-	Ood oomanaan kaga kalihi, kaaha waabariga 

-	Car haddaad kasmada sheekh ku tahay, celi kalaamkeeda?

-	Kildhi shaaha koob iyo fijaan, raaliyadu keentay

-  	Kibistii laguu qoray iyadoo, kulan laguu siiyay

-	Shay aadan kaafigii arkayn, kuman haddaad joogto

-	Eedan kajeeladii dhigayn, celi kalaamkeeda?

Xadiis Axmed Caabi ayaanu ka helay.