Galow ciyey allaylkii dadkoo, gama'sanoo jiifa

Galaayuuska qaylada la kacay, goor habaynima ah

Garaadkiisa kama uuna heline, goondhabaa jira'e

Dhegihiisu goortay maqleen, kor u galaydhyeeye

Geestay ka yeedhiyo wuxuu, galawgu sheegaayo

Gamandhacada saaqdiyo halkay, guuldaradu taalo

Tol-Allow wuxuu gocan galawgu, yaa i garansiiya?

Gudcur dam ah habayn soo galiyo, xilliga oo gaabtay

Dayaxoo gabaabsiyoo godkii, cidhifka gaadhsiiyey

Gor-gor duulay geedkii ka kacay, oo hawadan guureeyey

Garaadkiisa kama uu heline, goondhabaa jira'e

Tol-Allow wuxuu gocan iyana yaa i garansiiya?

Gucumaale aaroo wax badan, gaajo miranaysay

Gaaroodi qiiqdiyo fadhiyay, guban abaareedka

Oo goodir iyo cawl heloo, guudka kaga booday

Oon goosan hilibkeedi oon, micida gaadhsiinin

Garaadkiisa kama uu heline, goondhabaa jira'e

Tol-Allow wuxuu gocan iyana yaa i garansiiya?

Gu'ga oo barwaaqa ah dhulkoo, ubax ku gowriiro

Gudgudaale rooboo da'oo, geyiga saameeyey

Geedahoo magooloo caleen, guudka sare buuxdo

Ooy gamashi xooluhu yihiin, gorofna loo qaadi

Geelii inuu rimo la rabay, gaaniddii oloshay

Awrka guuxa diidee haddanna, goonidow baxay

Garaadkiisa kama uu heline, goondhabaa jira'e

Tol-Allow wuxuu gocan ratigu yaa i garansiiya?

Nin da'diisu lixdan gaadhayoon, guursan waligiisna

Guunyana aan waayine Illaah, gacantana u buuxshay

Caafimaadna geestii kastaba, Guulle ugu deeqay

Gabdhahana u haasaawe tagin, gaabsi iyo guurba

Garaadkiisa kama uu heline, goondhabaa jira'e

Tol-Allow wuxuu gocan ninkaas yaa i garansiiya?

Afartaasi waa gogol dhiggiyo, guudmarkii hore dheh

Galawgiyo shimbirhii ciyiyo, geeli rimi diiday

Gorgorkii habaynimo kacee, guura bahaleeyey

Libaaxaan ugaadhuu gambiyey, goosan hilibkeeda

Awrkii guuxa diidiyo ninkii, guurso laga waayey

Isu gee dhammaantood illayn, waa go'aan qudhahe

Murtidaan gagaabee go'iyo, gibilka aan saaray

Gedda kale haddii aan u rogo, gabi ahaanteedba

Waxaan uga gol leeyahay haddaan, idin garwaaqsiiyo

Aduunyadii gariir baa ka dhacay, goob la joogabae

Gantaal iyo waxaa laysku ridi, gummucyo waaweyne

Gaarruumo xoog badan haddii, laysla wada gaadi

Ooy nabadii geed sare kortooy, gaabatooy oroday

War saw galawgii foodhyaayey, iyo gogol-dhiggii maaha

Shir gadaaman goortii la furay, dunidan guudkeeda

Gadhwadeenadoo idil markii, foodda lays galiyey

Garyaqaan xaqiisii maqnaa, gacanta muu taago

Annaa kaa gu' weyn ee adigu, gaabi hadalkaaga

Go'aankayga soo raac adoon, bogan garaadkaaga

Godobtaada kaa maqan marnaba, ha u galiilyoonin

Waa waxa adduunyadan gubayey, lana galoofooday

War saw geeli rimi diiday iyo, gogol-dhiggii maaha

Gardarada cadaanka ah haddii, guudka loo fidhayo

Geesigii itaal daran haddaan, garab la siinaynin

Isaguna hubkiisii gurtoo, gummuca soofaysto

Oo kii xaqiisii ganbiyey, gawrac ugu jiido

Ooy nabadii geed sare kortooy, gaabatooy orodo

Gorgorkii habaynimo kacee, guuray sow maaha

Gefka labada kaan geline denbiga, lagu ganaaxaayo

Midkii nabarka geystayna dacwada, lagu garsiinaayo

Gafuurada xaqaa laga xidhxidhay, ganac dilaaciisu

Libaaxaan ugaadhuu gambiyey, goosan sow maha

Gardh-madoobe buuxsamay abwaan, garasho loo uumay

Aqoonyahan gun iyo baar cilmiga, goostay midhihiisa

Oo loo gardaadiyey sharciga, geedi-gelintiisa

Xilkii uu ka gaban-gaabsadee, gudan lahaa tiisa

Guri joog gambooley la yidhi, geeya waa amare

Oo guud caddaagii xukumi, garina deeqaynin

Ninkii guursan waayiyo war sow, gogol-dhigii maaha

Gudban dhererran geesaha lammaan, lagama guuraanta

Googaale hadal waa ku gan eh, gannaf dadkii haysa

Gacan miratay gufan tirasheed, dufan ku geyn-geynka

God ku rido gadaal hawgu dhugan, galabsayaa mooyi

Gartooxsiga giriirixa wajiga, kuu gilgili booto

Annaa golosa geenyada annaa, saaran guradeeda

Wuxuu Guulaheen xarrimaan, diinta soo galine

Gabdho iyo rag way siman yihiin, guul aan siday weeye

Gacan saydhka culimadii la timid, iyo gumaadkeeda

Godad loo qarqooriyo markuu, iilka wada geeyey

Cuqubada galshada buuxisee, gayiga saamaysay

Guulaamadii soo kacdiyo, galowgii eedaamay

Mar uunbay gadoodkeedu iman, guluf colaadeede

Guuldarooyinkaa rimani marbay, geli shinkoodiiye

Gidhgidhahan istaamayi marbuu, gaadhi qarixiiye

Marbuu gaanka qaayibani nafluhu, googan kaligiise

Geedada balaadhani marbay, golongol dhuubnaane

Guryo dabaq ah kii lihi marbuu, geed dugaashaniye

Ninkii godob lahaan jiray marbay, goosan aanaduye

Geenyada marbuu fuulayaa, guba ka sii dara

Gacalkiyo xigaaladu marbay, kala go’aayaane

Gaajiyo marbaa loo dhammaan, gummuc rasaaseede

England gaalka joogaa marbuu, soo gurmanayaaye

Markay gaadho heer gobanimadu, gebi qarkii fuusho

Oo gacan ka hadalkii wadkuna, guduntu ay daasho

Oo galabsigoodii abaal, loogu gudo fool xun

Markaasaa galaydh Awliyaad, Guulle soo diriye

Gacan malaa'igeed baa la marin, gocosho kii qabaye

Gudgudaale nabadaa di'iyoo, geyiga saamayne

Markaasay karaamadeenii gudhnayd, gebi ka weynaane

Haybadeenii gaasirantay baa, gaan u buuxsamiye

Geyi hodana buu noqon kolkaa, geeska aan nahaye

Geeridu ninkay dayso ee, gaadha midhihiisa

Ee uu Guulahay ku simo, garasho faalooye

...