The largest online collection of Somali poetry

 Gabay gabayada dib-u-heshiinta ee abwaanka ka mid ah oo uu Soomaalida ugu sheegayo in ay Rabbi u noqdaan si ay uga baxaan collaada ku habsatay.  Wuxuu yidhi:

• Waagii wanaagiyo la nacay, weheshigii kheyrka

• Waaciidsigii walaalnimo markii, laga walaahoobay

• Waaguu wareerkiyo na galay, waaladiyo tiihu

• Waagii wadiifada la jaray een, wadnaha goynay

• Waagaan is wada weerarnee, la is wareenteeyey

• Waagay walaaladu noqdeen, nin iyo waabtiisa

• Waagii wallaahida la maray, wacadna beenoobey

• Alla maxaan waryaadhaay ku idhi, oon waramay daacad

• Alla maxaan warmaha laysla dhici, waali u arkaayey

• Alla maxaan dad badan oo waxtara, waaberyaba laynay

• Alla maxaa wadaad iyo duq iyo, walliyo geeryooday

• Alla maxaa islaamo aan wax qabin, la iska weydaystay

• Waraqyada intii laga xidhoo, waadi lagu tuuray

• Sidii waxar mareeg galay maxaan, kaga wajiiqsiinay

• Alla maxaan wadkiyo geeridiyo, wiiqashada diiday

• Alla maxaa wadnaha laysku jaray, gumuca wiifleeya

• Alla muxuu waraabuhu habcaday, hilib walaalkeen ah

• Alla muxuu wijiiriyey intuu, waayo ku casheeyey

• Alla maxaan nin weyn oo khaldamay, waaniyoo la hadlay

• Isna muxuu ka weyraxay sidaan, wax  ugu sheegaayey

• Anna intaan wisiisiyey maxaan dib, uga soo  waabtay

• Dhiigga wilic leh waagaan gadneen, qalannay willkeena

• Waddamada shisheeyaha maxaa, welimo loo doontay

• Alla maxaan shir laynaga waciyo, gogala weetaynay

• Alla maxaan wax laynoo qaliyo, weelashii madhinay

• Wuxu maxay ahaayeen maxaa, laba isweydiisay

• Alla maxay xumaan waartay iyo wadhi, nasoo gaadhay

• Muxuu inagu wiirsaday nimaan, hor uga weynaanay

• Kolleey sharafkii webi buu ku dhacay, waanan aragnaaye

• Waan-waan haloo raadiyee, talo isweydiiya

• Haddii kale warjeefkiyo xiqdiga, abid wanaag mooda

• Warka gabaygu waanuu ahaa iyo, wanaag doone

• Marna wah iyo ciilbuu ahaa, iyo walaahawe

• Wadna gooye qaar baa ahaa, wad iyo eedaade

• Marna ficil wadani buu ahaa, cadhiyo weerreeye

• Isku wada dar weel qudha ku shubo, waa is waansada

• Waddadii xaqa ahayd haddii, laga walaahoobay

• Wadiiqaha la doorbiday hadduu, wey na dhaxalsiiyey  

• Waxaa ila habboon nabad inaan, uga wareegnaaye

• Waagii baryaba waxaad heshaan, taliyo waan waane

• Ummad yahay iswaanssada inaad sharafta weynayso

• Haddii kale wadkiyo geeridaad, weheshan doontaane

• Weligiin waxyeeliyo ku jira, weerarkiyo boobka

• Bal waayahay haddaan soo wadaco, gabayga wawleeya

• Waxaan idin odhan lahaa haddaan, waaga ka caddeeyo

• Weydada irmaan iyo ilmaha, daba walaansheeya

• Adoo wada walwaaliyo bannaan, amase weeraare

• Waraabuhu hadduu kaa didshiyo, weer hunguriyeeyey

• Midba meel hadduu orod wajaho, oo la kala weecdo

• Waa woohabayn iyo duboo, waxaad tidhaahdaaye

• Soomaaliduna waayahan sidaa, waw ekoon tahaye

• Waxaa inagu waajib ah inaan, Waaxid barinaaye

• Wadaad balag u aasiyo intaan, culimo weegaarno

• Ha isweheshatee Eebeheen, samo aan weydiino