Magaaladan Wajaale ah maxaa, weerar soo galaya

Maxaa ceel wadaameed ka qodan, laga waraab qaato

Wadda halaq maxay soo gashaa, webiyo xaaraan ah

Maxay tahay waraar lagu dhaciyo, waadi lagu daato

Wershad naga qarsoon iyo maxaa, wecel yaqaan jooga

Maxaa weriye cadawga u shaqayn, waajirka istaadhi

Wakiil Xabashiyeed iyo maxaa, Waarso nin u taagan

Maxaa Washington qaar ka yimid, la isku weydaaran

Walangoo maxaa ila fadhiya, waramo soofeysan

Wacad-qabe basaasiyo maxaa, wali isdhaafaaya

Woqooyi xeebaheediyo Galbeed, waxa ka soo buuran

Ee waddan xumeysnimo aheen, wali la soo saarin

Wafdiyada qarsoodiga ah iyo, wiidada isdhaafi

Wareegtada qabiil weyrixina, wah iyo ciil beerka

Wasiirada badhkood waxay wadaan, waaxyo kala goyne

Waraaqaha sirta ah ey qoraan, wiigba dhan u qaadka

Wadaad-xumaha loo dhiibayee, ee laba wajiileeya

Wax ka maqan iyada oyna jirin, weyda iyo taaha

Wareentada haddaan laga hortagin, waa dhaw iman doonta

Wadaadkii qabsaday Shaah markuu, weerarka istaadhay

Wadiiqooyinkii Aaytullah, waagi laga keeney

Waxdadahan siyaasado wateen, een wali la dhooroofin

Wiilashiyo hablaha aan arkee, ee waalidkood duraya

Ee iyagu waxaan loo fadhiyin, soo walwaalanaya

Waxaa iyo wax kale oo ka daran, oo walbaa jira e

Inkastoon waddaniyiin ogahay, waa dhaw qaban doonta

Waxyeeladu Soomaaliya intii, ayan ku weynaanin

Inaan wadajir looga hortagaa, waajib saw ma aha?