|
Ha is Raacdo abwaanku wuxuu
tiriyey 1992 isagoo jooga magaalada Qabri-Dahare. Waa gabay isugu
jira toosin, tusaalayn, dhaliil, iyo gubaabo oo uu kula hadlay Jabhadda
Wadaniga ah Xorraynta Ogaadeeniya (JWXO)
iyo shacabkaba. Wuxuu yidhi:
Allifaadi
maansooyinkaan, soo abaabulaye
Maqaasiino awdnaan jiraan,
furay albaabkiiye
Afku way xadaayaa markii,
uurku buuxsama e
Waxaan la amakaagaan arkee,
ma iftitaaxeene!
Eegana iraadada Allaan, ku
unki doonaaye
Insha Allaahu waaniyo
talaan, ku anbaqaadsiine
Idam Eebe meel aaya laan,
ku ebyi doonaayee
Abwaan gabay yaqaanoo dhan
iyo, axadka maansooda
Arartiyo tusaalooyinnada,
amase aas'aaska
Iyo aadmiguba say yihiin,
wadar ahaantooda
Nin waliba aqligii buu
hadlaa, oo arimiyaayee
Abuur gaara buu leeyahay,
oos ku ijtihaadaye
Oo wuxuu is leeyahay adaa,
ugu itaal roone
Ha yeesheese layslama eke,
axadba waa heere
Ikhtilaafka saasowgu wacan,
lays af garan waaye
Waxse lagu uruurshaa
ra'yiga, ama is raac keena
In la helo awood gobonimo
iyo, xeer Islaamiyahe
Hadii kalana eed kama
baxdiyo, aano iyo qoyse
Markaasay utuni beerantaa,
laysku aynaba e
Aafadu kolkay durugto ee,
layska wada aarto
Agoon dhalata mooyee
markaan, axadna guulaysan
Adaa iile iyo eersasho,
bay ku intihootaaye
Afrikaanku saa inay yihiin,
ma inkiraysaane
Oo waan ogsoonahay intii,
uu ataag dhacaye
Ol-olaha colaadeed mudduu,
naga dhex oognaaye
Oo aqalba aqalkii ku xigay,
aabi ku ahaaye
Ajal dhimatay mooyee ma
jirin, qolo adkaataaye
Isticmaarkan sababtiisu
waa, sidatan awgeede
Inaguna waxaan eednay baan,
ku isticmaalaaye
Ma ilbixin dadkii aan
lahaa, ways anfacayaane
Aayaha dadkooda iyo
xornimo, uma adeegaane
Ubadkooda nolol dawladnimo,
uma abuuraane
Iskuulada kuwii soo bartay
baa, ugu ifsaad wayne
Ninba unug qabiila buu
xumaan, la hor ordaayaaye
Laba axad wax kala gaadhay,
bow kala ufootaane
Kamana uur gubyootaan,
wixii geesi iil galaye
Aqliga iyo Soomaaliyeey,
waaya arageenu
Aqoonta iyo garaadkeenu
sow, eber ma soo dhaafo?
Asaagiin sidaad uga
hadheen, dib uma eegtaane
Axmaar nama gumaysteen
hadaan, aaya leenahaye
Afkoo laga hadlo iyo waa
hunguri, waxaan ku aadnaaye
Na arkaaba yaabyaye xaggay,
iintu naga raacday?
Albaabkii furmaba way xun
tahay, inaynu awdnaaye
Ma ahayn iftiin baa baxaye,
inaan il duufnaaye
Inaan ururo badan yeelanaa,
waa aqoon xuma e
Awoodeena oo naafata iyo,
adhax jab weeyaane
Isla weynideena iyo duliga,
nagu amookaysan
Malaha asmaa nagu dhacdaye,
ma arki waynayne
Abidkiin intaad saa tihiin,
ma aflaxaysaane
Ummadii khilaaf galo
xornimo, uma arooraane
Istiqlaal waxaa lagu helaa,
waa uruursaniye
Ilma adeerayaalow intaan,
Eebe ka cabsoono
Eritrea waa xor ee intay,
noo asixi teenu
Innana uursamaan iyo
midnimo, maan isku ogaano
Tixdan waan ebyay ee wadar
ahaan, saas ha ku idlaato
Laakiin ma awdine midbaan,
soo unkahayaaye
Arinbaana ii laaban wali,
O da khaas ku ehe
Abwaanada kaleetee jiroow,
idina aagiina
Dhamaantiin af tahan baad
tihiin, weedh abuura ahe
Iraadadu waxay waafaqday
baadse, odhan karaysaane
Ninba aashi how sacaba
tumo, oo hayska jiro eexda
Gobonimo sidii loo askumo,
uunka maqashiiya
Inay tahay israac iyo
midnimo, wada ogaysiiya
Utumaha dhexdeena iyo
tirtira, aaradoonimada
U akhriya wixii ina anfaca,
oo ku amar siiya
Ogaadenya waa dal ee
qabiil, aan iska ilowno
Waa magac astaan u ah
dalka, oo loo aqoonsadaye
Intaad maabka eegtaan
wixii, noo ismiya raaca
Ikhtilaafka naga daaya waa,
anfaca shaydaane
Dabadeedna waa lays af
garan, idam Ilaaheeye
Tan ebyay ee hadana tii
kalaan, soo abaabuliye
Laakiin afeef gaaban iyo,
ood yar baan dhigane
Ilaahay jidkiisa iyo
xaqaan, ku adimaayaaye
Iinta iyo qaloocaan rabaa,
inaynu awdnaaye
Macnaha yaan xumaan loo
awilin, waan af dheerahaye
Hadba orotanada
doorashada,ururka guulaysta
Oday reer u weyn bay
micnaha, uga ekaadeene
Sidaa aawadeed waa inay,
aaminaan samire
Anshax iyo xishood waa
inay, ku amranaadaane
Waa inay astaantoodu tahay,
sir iyo aadaabe
Haday aaran fawda noqdaan,
laga ugaadhowye
Dadkuna ma indha beeline
macnaha, wuu arkahayaaye
Ujeedada hadii aanan ka
gudin, een runta abaaro
War waa laydin eedaynayaa,
ururka JWXOw' e
Ashtakooyinkiinaygu badan,
goor iyo ayaane
Intaa waxaa la ii
sheegayaa, iimo fara wayne
Afbay labadi wada
qayliyeen, odayadiiniiye
Wayna naga ufoodeen dadkii,
ooda nala yiile
Ma aqaan wax laynagu
arkayee, nooma uur sama e
Inamo iyo haween iyo
caruur, ubada mooyaane
Wax la yidhi
aqoonyahanadii, waydun erideene
Wax la yidhi indheer
garadka, waad ka anfariirtaane
Ixtiraami waydaa la yidhi,
aabihiin rumahe
Allana kama baqdaan baa la
yidhi, aalayahay baase
Waxaad uruurisaan iyo
wixii, aadmi noogu deeqo
In yar lagama haystaa la
yidhi, unug dhaqaalaade
Alla magane taariikhdii
baad, soo af qabateene
Abtirsiimadii meel dhaw
baad, ka isticmaasheene
Axmed iyo darwiishkii ilaa,
ururadii geeshka
Halgankii ilkaha laysku
cunay, ee rag ku idlaaday
Halgankii uluuf iyo uluuf,
lagu agoonteeyay
Aastaa la leeyahay wixii,
uunku soo maraye
Afar iyo shan sano oo
qudha, baad ka ictiraafteene
War ma uurki laawuu ahaa,
ciidankii Aga-bar?
Ii sheega Duufaan maxaa,
lagu ihaanaystay?
Abaalkoodu mee Dhaarsane,
iyo ururka Yaasiina?
Xagay aaday Yaacdo iyo
kuwii, Xabashi iimeeyay?
Sidee uga ufooteen raggii,
iibshay noloshooda?
Arin kama rabaan baa la
yidhi, aynigii hora e
Siyaasada af-duubtaa la
yidhi, dhawrka inanow e
La aqoonsan waa meesha aad,
ka il-dhabaysaane
Olyatiibadiinana la waa,
aaga ay tahaye
Argagixiso waynbaad
shacbiga, ula ekaateene
Ashkatada dadweynuhu haday,
saa run ku ahaato
Xornimadu inay aawadiin,
la indha beelayso
Idaacadu ma fiicnee hadii,
marag la soo oogo
Aasaaski hadafkeena guud,
saatan ma ahayne
Albaabkii xaqana baadhil
baad, uga abraarteene
Anbad iyo dayow baad
gasheen, ooma soora ahe
Aqlina kuma hadlaysaane,
waad alaladaysaane
War ogolaada khaladkaad
gasheen, hays adkaynina e
Istiqaalo dhiiba oo
cafisna, ehelka waydiista
Ninbana wuxuu abaalkiisu
yahay, la arki doonaaye
Insha Allaahu gabaygayga
waan, soo ebyahayaaye
Aakhirul kalaamkii hadaan,
saan il bidi sheego
War kolka hore adoomaan
nahee, Eebe ka cabsooda
Axdigaad ka qaadeen
Rabbiga, oofsha tabartiina
Waa laydin iiliye qabriga,
uurka ka ogaada
Aakhara xasuusnaada waa,
lays abaal marine
Yaan lakala irdhayninee
khalqigan, ooda wada yaala
Dhamaantoodba uugaamiyoo,
ururkan xoogeeya
ONLF yaan qoys la badin,
waa arlaa'igane
War waa urur siyaasiyahe
yaan, cidina aanaysan
Ikhtiyaarkii weeyaan
mabda'a, ruuxa aamina e
Dad ayidahayaa jira'e yaan,
ooda laga saarin
Anaa idhi ha laga daayo
iyo, amar ku taaglaynta
Afartii Absame Kuumade iyo,
duqa adeerkooda
Aabo iyo hooyaa dhalee,
aasa godobtooda
Ixtiraam ku maamula wixii,
culimo reer Aw ah
Akishe iyo Bursuug yaan
xumaan, uurta loo galinin
Il qaloocan Garri Koombe
yaan, cidi ku soo eegin
War waa eheladeen
Jaarsuhuye, saa hala ogaado
Yaan ooda Ciise iyo
Gur-gure, eedi naga gaadhin
Aqoonyahanka Godobiirsay
yaan, erey xun loo gaysan
Iyaga iyo Ilaahood wixii
uurka, noo daba e
Ixsaankooda Reer Sheekh
Isxaaq, aad u sii badiya
Hana lakala asluubsado
wixii, ubaxa Daarooda
War yaynaan ka aargudan
Harti ee, nabad ogaysiiya
Haday uur gumaar noo
qabaan, duulku waa ehele
Inagaba il gaara baa jirta,
oon ku aragnaaye
Ergo sama abuura ah u dira,
oo islaax dhalisa
Hawiyaha aan aanaysano iyo,
Irir wixii sheegta
War waa reer awowgeen Dir
kuye, duca ha loo aado
Garre odayadiisa iyo la
shira, waaya aragiisa
Axdi dheer la qaata oo
Gurrena, la itisaal yeesha
Garriire na hadii ay
umlaan, yaan lasii erinin
Is ogaada oo Baydislaha,
aag kawada duula
War aqoonsada Dagoodigu,
inuu yahay dad iimaan leh
Inta aad albaabka u
furtaan, eega dariskiina
Yaan lala akeekamin wixii,
Tima Adayg sheegta
Ururka ay Gabooyuhu
dhisteen, waa inaga uune
War anfaaciga wadaaga oo
tashiga, siiya eraygooda
Soomaali idilkeed dumoo,
uubato u qaada
Aafooyinkii yaan wax
dhacay, la isu aanaynin
Dadka wixii Islaam ahiba
waa, ul iyo diirkeede
Ereygii rasuulkeenu yidhi,
aynu ka adeecno
Ha is raacdo mooyee wax
kale, uurku yuu gocanin
Insha Allaahu saasaan
rabaa, inay ahaataaye
Shariif
Dheere ayaa ku deeqay. Mahadsanid |