• Xirfad maqan xuruuf la isku daray, iyo xarafyo aan muuqan
• Xariiq jeexan xaalado qarsoon, xaashi kula taala
• Xusuus qorid xisaabo aan lahayn, xaajo oday dooni
• Xayn diratay xardhimaale iyo, xuufle daba taagan
• Xumaan dalab xariif jaamici ah, xeel nin kula gaadi
• Xoogsade af-miinshaar ah, oo xero-bilaash ootay
• Xaaraanta kama caagane iyo, xoogsade iyo boobe
• Xidh libaax dad-qaad ahi galo iyo, xuunsho laba baad leh
• Xayndaab la ii dhigay, sidaan ugu xambaarooday
• Xanaaqii sidaan ula gagabay, amaan u xayraamay
• Xigmadaydii wali Baashiyow, sooma xaadirine
• Xalay ka horba suugaantu, way iga xijaabnayde
•  
• Xinjir bururtay xudun dooxantay, iyo xidido naafoobay
• Xabadihii ku dhacay geesigaan, xubin fayow haysan
• Ee xagasha looxu ugu jiro, xoogguna curyaamay
• Dhaawaca sidii uu yahay xashiish, meel walba xooray??
• Een helin xanaano iyo cunto, ee xalay qadee ooyi
• Xanuunkiyo rafaadkuu qabiyo, gaajo la xabeebtay
• Xusni iyo xiqdi iyo ciil dartiina, xoodhin timahiisa
• Xafaarahan bugtaamay ee dibtii, xaaduna cadaatay??
• Iyo xaas ninkii qabay dhintiyo, xilo agoontoobay
• Dumarkuu xishoodku u sugmay, iyo xaawaley jilicsan
• Odayaashan xaabsaamay, ee xoosh cadaadigan ah
• Xaqa culimadii fidin jirtiyo, xaafidul qur’aanka  
• Xertuu waday iyo sheekhii cilmiga, lagu xurmaynaayey
• Xarfadaha il-duug meel kaluu, xadhig ku yeeshaaye
• Xariirtiyo nimankii dharkaan, xidhano keenaayey
• Xeer li’i hiddiyo dhaqankii, ee xadda u yiilay
• Xagar hoostii odayaashayadii, xukunka qaadaayey
• Xabashida qaxootigii ka yimid, xamagtii caydhowday
• Xaqiraada joogtada ah iyo, xumaha loo gaysan
• Xishmad li’ida iyo dafiir, dhawr xasaradoode??
• Xidhayga iyo xatow-gooyadiyo, xeer islaam gudubka
• Xabaal qarinta xamag qabashadiyo, waliba xuub saarka
• Ku xadgudka xangaruufadkiyo, xanan ku jeexjeexa
• Dawlada xuquuqda u qortay, iyo xoolihii qaranka
• Xoxob galinta kala xeeriddiyo, xeedho madhan siinta
• Xunbo dhaydii laga nuugay iyo, xoor goh u reebka
• Midmidkii sidaa ka xantadana, gee xabsiga dheerka
• Xasuuqii gumaystaha ka daran, xaaladay mariye
• Xaqa inaan caddeeyaana, waa xaajo ii furane
• Xumaantaasi waxay noogu dhici, xididka beeraaya
• Xammaasadahan badan ee ku furan, xinkii Hargaysa
• Ama xamaasadaha badan ee jira, ee xulaya Soomaali
• Xasadka iyo xinkiyo cayda iyo, xulufo sheegsheega
• Xukuumadda bulshada laysku diri, xiisado abuurka
• Xamar iyo Waqooyiga Galbeed, kala xujayntooda
• Taasaay xaqiiqada runta ah, ka xabdhabaysaaye
•  
• Xorayntii Soomalida Galbeed iyo, xaqaa duudsan
• Xafiisyadii wakiil looga dhigay, xidho dagaalkiiye
• Xilka madaxdii loo dhiibay iyo, xarumihii qaybta
• Xidigle iyo gaashaamayaal, Xoogga laga keenay
• Xadayaasha boonada Jigjiga, xadhiyihii saadka??
• Iyo xoghayihii baw kordhiyo Xaashi Cumar Nuure??
• ………… xeegaan biyo ah xagagaf aan buuxin
• Xuud oomay xayawaankii kale, xal u hanbayn waaye
• Xaabsaday xafiiskanay ku xalinaayaane??
• Xabbad-joojintaa nagu dhacday iyo, xarakadaa taagan
• Waa xaafado u kala madhki iyo, xumahay beereene
• Iyo xaabaday ololiyeen, xiinka ka baxayaaye
•  
• Xakamaha fidaa’igii la sudhay, Xabashi laynaayey
• Xiniiyaha dib loo soo dhuftay, ee xiidmuhu ordaayo
• Xaalkii gumaystaha, qabyaalado xusuusinta
• Xarbo galin dhexdoodana falka, iyo ha isku xaaqmeenta
• Xasadkiyo xigaal gawraciyo, gaar u xarakadaynta
• Anigoo si xog-ogaalnimo ah, u xabad qaadaaya
• War xaaladdu waxay daaran tahay, lala xudhlaynaayo
• Xad ku sheegan inuu soo dagaa, Xaylo Maryama e
• Xero Cadan dhexdeeda ahna, Ruush kala xidhiidhaaye
•  
• Hayeeshee xaqiiqadu ka weyn, shay la xadayaaye
• Xayaatada Soomaalidu markii, ay xasili wayday
• Xisbi Yurubku Baarliin, shirkuu xin ugu qeyb qeybshay
• Xaskuu galiyey umaaddaan ka hadhin, ee u wada xaytay
• Xeel iyo siyaasaba dadkii, xoog dabka u jiidhay
• Xaajooyinkoodii markii, xaakimku u eegay
• Xaqbaa calankan lagu siiyey, iyo xukun Ilaahaye
• Xisbiguu Kacaanku u dhisay, iyo xoogan barakaysan
• Inta ay xalaal ula wadaan, xaajiga hogaamin
• Xagga Eebahay buu ka yahay, xaraman aaminan e
•  
• Ninkastoo xumee lihina wuu, ku xayirmaayaaye
• Ximri-dhiigu ragguu saaran yahay, xuurtuna ilaashan
• Iyo xaasidow maanta waa, xero ba’aagiiye
• Xudhxudha iyo xamxamtaada iyo, hoos u xamashlaynta
• Xaafado wareegaysadkiyo xeel, u socodkaaga
• Xirib-jabinta boqon xaabintiyo, dabin xidhayntaada
• Xafiisyihiyo suuqyaha madow, xan iyo been sheegga
• Carrabkaaga xanaf weynida iyo, xiiri ogidaada
• Goortaad xaglaha dhaansatana, xor isku sheegaaga
• Xalaalnimo ku faanka iyo qalbiga……
• ……

Nasiib daro gabaygan dhamaadkiisii ma hayno.  Haddii aad dhamaystiri karto nala soo xidhiidh.