Jiilaal durraaqsaday wuxuu, nagu dangiigaaba

Dabeyluhu waxay nala dhacaan, daafad iyo qiiqba

Kol uun baa darxumadii la qabay, layska damiyaaye

Shinbirkaa durduursiya markuu, doogsi naawaliye

Cir diraaci soo daaran tahay, waa dugsiin jiraye

Dayaxiyo shamsada oo kulmoo, daaqad wada jooga

Deegaantu labadaa markay, diilimada saarto

Ebidkeed diraacduu hongaa, daafku dhiigluhuye

Durgufkiyo caddaadkii miyaa, nagu dul heehaabtay

Diridhabatay maantana, waxay di’ise mooyeene

Soo durugtay maandeeq, sidii deeqdi karameede

Iyadoo sumado deel ah iyo, diintii Nabigii leh

Duleedkay ka reentaa hashii, loo duceyn jirey

Rabbi waxaan durraansaday, inaan laban ka duugnaaye

Naga dabacsan lawyada wixii, naga duubnaaye

Dahaadhkii indhaha noogu jirey, nalaga sii daaye

Dib Allow ha noo celin adaan, kugu dacwoonaaye

Dal nimaan lahayniba, wuxuu dageye xaaraane

Doolqaad ilbaxay jeer danbuu, kugu dul maydhaaye

Daakhliga waa laga shaqayn, deyrtan maanta ahe

Ha lays wada` dugsado waa intaan, daamurka u qoyne

Dabku ku dacalle doodnaar cayilay, dabata qawlaysan

Dul abaarre deyntiyio ku nool, duudsigiyo ceebta

Duqduu dhalyey way nagu jirtaa, duud abeesluhuye

Idinkaa da’baas yahay kufriga, iiga sii daran

Hadba nimaanu daaraan nahaye, ima daqiiqene

Cadaawaha na darandooriyaad, daawo dhigateene

Allahaydin doorshee sharcigaad, meyl ka durugteene

Dawan baa iblays uga tumaa, meel dushoode ahe

Dalka hooyo waydan lahayn, dibaad u joogtaane

Dangayahaw haddaydaan ahayn, dir isla ceeboobey

Daa’imanba gaalada maxaa, idin dul gawriirshay

Digaday Sagaaradu dhigtay, dad istiraahdaaye

Darkaan xidhaba waa maalintay, dooxi jireyeene

Halkay doqontu awrka u wadaan, doo’da ka hayaaye

Nin xabaalo duugaan ahiyo, duulal baa bayey

Isku dagannay Soomaaliyey, daawashada guude

Hadba kii dajida soo cabbaa, haygu doob-dhabo e

Duufaanka soo kacay haddaan, laga digtoonaanin

Daafucul balaayaha haddii, loo degdegi waayo

Dal kaloo la aadaba haddaan, keena laga doolin

Danbaa tidhi haddaan looga tagin, daaqatiyo faafan

Meejiyo Denaakilo haddaan, caydh la dalandoolin

Hadday daasaskaa wada camir, duni ka laadlaado

Dergad haawan mooyeen haddaan, daaqad laga waayin

Haddii anu waraabuhu dibbirin, dubur ku gaajoodey

Dadkan diika-diikoon haddayn, dooxatadu leefin

Dab nin haysta mooyee hadday, dacawo noolaato