1. Nin Ibraahinow geeskan bari, garani xaalkiisa

2. Haddii uu dagaal gacal yidhaa, waw guntiyo xeydan

3. Guuldarriyo inuu ceeb mutaa, waysu garab oole

4. Bal si aan tusaalooyin gara, kuugu gada sheego

5. Goobjoog wixii dhacay ka qorey, geeddi socodkeeni

6. Aan taariikhda guud mare, gabaygan feenfeeno

7. Boqorkii galbeed iyo sharqiba, gaadhay magaciisu

8. Gumeystaha adduunkiyo ninkii, Yurub la guureeyey

9. Googoynti Barliin ninkii, gobolki loo daayey

10. Rabbi baan gaboobine ninkii, boqol gu’ noolaadey

11. Galabtuu cadhoodaa ninkay, Xabashi guulaantay

12. Gabla loo sujuudiyo waxay, rag u gurguurtaanba

13. Ninkuu gacanta saaraa waxay, guul u noqotaaba

14. Nabsi guradka kibir geedankiyo, geeda sare fuulka

15. Garta eexo waa wixi Mansiga, gaday duqoodiiye

16. Eritriya inay gaar tihiyo, gobanimow diidki

17. Oromadi garaac iyo karbaash, gibil madoobaatay

18. Qotidii waxay badar gureen, garabku naafoobey

19. Ogaadeenka geeluu lahaa, gibirka loo oodey

20. Shucuubtaa gu’yaal iyo gu’yaal, cadho guhaadootey

21. Ee ciilku gaawihi madhnaa, buuxa gabi dhaafshay

22. Geerida horteed bay ku ridi, maanu garaneyne

23. Ha gafaba nafluhu waa yaqaan, gabi dhacleyntaase

24. Ha ku go’aba jeelkii sidii, geesiyaal hore e

25. Inaan aaski galabtii cid tagin, go’aha yaw sheega

26. Mingistihi dagaalkaa galee, libin ku geeraarey

27. Dadweynihii gadoodee xornimo, meel fog laga geeyey

28. Garanwaa waxay goconayeen, si ay ku gaadhaane

29. Gacan adag wuxuu beegsadoo, kuman gumaadaaba

30. Guutooyin Ruushoo hubliyo, gaasas wada heegan

31. Gun la soo kidheystiyo wuxuu, Kuuba galiyaaba

32. Haba joogto guul uu dhashiyo, gacan sareynteeda

33. Car ha gaadho Casmara haduu, kibir nin meel geeyo

34. Gole shacabku doortiyo haddey, guurti talin weydo

35. Way sii gadoodaan markaad, ganaf la jiidhaaye

36. Inaan gumucu aadmiga bedelin, go’aha yaw sheega

37. Giir weyni iyo xoog hadduu, giijin taladaada

38. Geeda weynidiisii Amiin, galab ma luudeene

39. Wuxuu gananaf leeyiyo wuxuu, shacabka guulaaba

40. Gadaafiyo wuxuu gabadh rag dhalay, xumo u geystaaba

41. Meel dumarka gaadh laga hayoon, gees la dhuganeynin

42. Gunba niman u haystaa wixii, gibil madow oo dhan

43. Maantuu go’doon Carab ku yahay, gacal la’aaneede

44. Isagaa dalkiisii ganbiyey, gurubsi eedeede

45. Gurmad iyo in hiil loo galiyo, garab warkii daaye

46. In gabaahiirtaa uu ku dhiman, go’aha yaw sheega

47. Intaa gogoldhac waa tusmiyo, guud u hadalkiiye

48. Ninka gurigii horayaa mid kale, siini waa gacane

49. Gudaheena hoosiyo balaan, gacalki faalleeyo

50. Gadhwadeenkii aan taabacniyo, macallinkii geeskan

51. Waa labaatan guuradi Siyaad, gu’gan la joogaaye

52. Guul iyo wuxuu libin dhashiyo, horumarkaan gaadhnay

53. Dhanna gaabiskiyo wiiqmadiyo, dib-u-gurkii muuqday

54. Labadaa inaan kala gurraa, saw wax gar ah maaha

55. In qabiilku cudur guuna yahay, go’iyo hooggeena

56. Googooyey oo shacbigu, meel fog kala geeyey

57. Gomadaha dabrani waxa xujuray, een la guran weynay

58. Inuu yahay guntii boogta ee, guuldarrada keentay

59. Durba garayey geesigu inaan, godad ku aasnaaye

60. Ha yeeshee go’ii waa madhnaa, iilka loo galaye

61. Gabashada intuu laba sabaan geedo, madax saarey

62. Wallee Golihii Sare waa fadhiyey, dhawr gu’ dabadeede

63. Inay shacabku taa garanayeen, go’aha yaw sheega

64. Garoomiyo jidkaa wada goglanee, baal walbaba gaadha

65. Safarkaa la soo gaabiyiyo, galabba meel jooga

66. Ummadaha sancada heer ka galay, samada loo guuro

67. Aqoon bay ku gaadheen cilmiga, dhaaxa gaamuraye

68. Bal inoo geddoodaa hiigsado, shacabkan gurguurta

69. In tacliinta loo wada guntado, laysu garab yaacye

70. Guddigii af Soomaaligiyo, guurti taladeeda

71. Farta guri guddoonkii la qorey, mudane waa guule

72. Garashada jahliga wiiqeyoon, goyno cidhibtiisa

73. Gurmad iyo waxaan geedi dheer, gibilka yuuqnaaba

74. Ololihii miyiga gaadhay iyo, kureyga geel raaca

75. Ololihi guryaha loogu dhigay, odeyga guurguurta

76. Gurdan raacii meel fogi ma geyn, galalaftiisiye

77. Tayadii ma giigsamin sidii, tirada guudkaaye

78. Ustaadkaan gunnada loo qararay, reerka gelin deeqin

79. Gabankii sidee wax u baraa, waa ninkaa gubane

80. Xiisaddii inuu soo galaa, way gabaabsidaye

81. Shahaadadan ninkii gini hayaa, gadan karaa maanta

82. Gundhaceedu waa kaadir aan, hawsha garayneyne

83. Gaasiryaye inuu gudhay cilmigi, go’aha yaw sheega

84. Gunta weel haddaan laga unkamin, gadow adkaan waaye

85. Gobannimiyo ruux gaaja qaba, waa ged kala dheere

86. Dhaqaaluhu intuu gaabis yahay, guul la hanan waaye

87. Galley iyo hadhuudh noo go’iyo, geeda midhahooda

88. Gool dibada loo dhoofiyiyo, giiro wanankeeda

89. Kalluunkaa baddeenaa gudban, buuxa gudhaeeda

90. Khayraadkeena gaaxsani inaan, guranno yoolkiise

91. Gabbal dhaciyo waa bari khudbado, lala galiilyoodey

92. Gu’yaashaa cusbaa waa isagii, gooha laasimaye

93. Guubaabadiisiyo hankaa, wadarba loo guuxye

94. Garri iyo gurbaan iyo ammaan, lagu galaydhyeeye

95. Guclihii hongow iyo hirkaan, gaadh lahayn shalaye

96. Garow iyo gasiin noo baxoon, guranna beenowye

97. Bariis doolar lagu soo gediyo, gini la soo deyntay

98. Guduudey galbeed laga baryiyo, gacanta loo hoorsho

99. Dib-u-guurka dhacay ceebahaa, saaran guradeenna

100. Gadaafooyin dheer baa jiroo, gubaya laabtiiye

101.    Hantideeni guud daakhliga, qaranka soo gaadha

102.    Sharcigii ku gaarraan jiriyo, gaadhyaha eega

103.    Xil u gaar ah ooy gudan karaan, ruuxba garan waaye

104.    Nin waliba godkii uu fadhiyey, gurey intii tiile

105.    Gacan dhaafka goorada sariyo, kaaga yimid guudka

106.    Gunta seed gufeys ugu xidhaa, saw ku guban meysid

107.    Garbo siman dadweynihii ahaa, maanta kala guurye

108.    Markuu qaar gofane naaxay yahay, gaajo qaar godaye

109.    Kuwa gacan togleeyaa markay, war ula guureyni

110.    Inay qaarka goomani arkaan, go’aha yaw sheega

111.    Caafimaad geddiisaba la daa, dhawr gu’yoo tagaye

112.    Cisbitaaladii guudi waa, meel galgalineede

113.    Gurmad iyo alaab loo gadiyo, daawo laga guurye

114.    Laydhkii ka go’an oo biyuhu, galin ma joogaane

115.    Takhtarkii ma soo galo shaqada, goorti loo qoraye

116.    Ninba goob yaroo ganacsata ah, galabtii loo aadye

117.    Marka dibadda qaar gooshayaan, geed markay xigato

118.    Qaar baa sariirtii ku go’ay, guri dhexdiisiiye

119.    Inay gacalka xiga ciil gubteen, go’aha yaw sheega

120.    Geeshkuu abaabulay colkii, guulay dariskoo dhan

121.    Inuu shacabkan googa’an midnimo, goob isugu geeyo

122.    Ciidnakii gu’yaal iyo gu’yaal, loo carbiyey guusha

123.    Gaatan socodka xeel loo gabado, gaadistiyo shiishka

124.    Gurdan raaca gaardiga ruclaha, geeddan socodkooda

125.    Ciidankii Galbeed iyo Sharqiba, tababar loo geeyey

126.    Ciidankii markay geylamaan, fiintu gama diidey

127.    Ciidankii habeen qudha ganbiyey, Xabashi geeshkeedi

128.    Iyo maanta goobtuu habsaday, guuldarrada haysa

129.    Sida loo gabbaanaday nin ogi, ciil gondaha ruugye

130.    Marka geesigii lagu bedelay, guulwadiyo daacad

131.    Garaadaha Islaan laga gurtiyo, eexda kala geysey

132.    Markay qaar garabaha buuxsadeen, gooman badidoode

133.    Tusbax go’ay inuu Geeshkii yahay, go’aha yaw sheega

134.    Afka beesha layskuma gashee, waad ku gubataaye

135.    Shacabkaa la kala geeyey iyo, gacalka eedoobay

136.    Nabaddii gabaabsidey gayiga, gabi ahaantiisa

137.    Gawaadhidu war guban wadaan, geeri iyo hooge

138.    Afartiisa geesood dalkii, la isku guulaanye

139.    Budhcad yari halkay goosataa, loogu gali waaye

140.    Guuxa Xamar ku jira wuu hayaa, Gaalkacyiyo Bay e

141.    Gadoodkii Woqooyi jirey u gudub, Gediyo Dhoobley e

142.    Dabka gobol ka soo bixi hayaa, gaatan socodkiisa

143.    Inuu Xarunta soo gaadhayaa, go’ah yaw sheega

144.    Qarankaa garwaaxsaday dalkaa, gabi ka laadlaada

145.    Guulamo dhiigliyo anoo garan, wax soo muuqda

146.    xaggeed galabta aadaa anoo, gama’ lileyn waayey

147.    Gardarrada wuxuu Ina Shabeel, godobta ii taaran

148.    Wuxuu iigu goodinihayaa, iga gab weeyaane

149.    Eedda gaaxsantaa marbay, ganac dillaacdaaye

150.    Godka aad qodeysaa abtoow, gurubsigaa eedda

151.    Gunta hoos u dheeree, ninkii gala u joognee