Gabaygan wuxuu gabayaagu tiriyey bishii Juun 2006.  Wuxuu joogay markuu gabaygan tirinayo magaalada Khartuum ee dalka Suudaan.  Wuxuu gabayga kaga hadlayaa xaaladda adduunku ku sugan yahay maanta iyo sida muruqu u taliyo.  Abwaan Xuseen Cabdi Xalane wuxuu ka mid yahay gabayaaga Soomaaliyeed ee mucaasiriinta ah kuwa ugu horreeya oo wuxuu aad uga waramaa arimaha caalamiga ah iyo kuwa geeska Afrikaba.  Eeg gabayadiisa kale ee Ina Bush iyo Geeska Afrika.  Wuxuu ku billaabay:  

1. Qaaradaha Caawaalow siday qaybtu tahay maanta

2. Qalin iyo aqoon kuma tidcana qaabka loo dhigaye

3. Qorigaa wax lagu eegayaa qoondahaad heliye

4. Reerkaan qunbulad weyn lahayn waysagaa qadaye

5. Wax Maraykan qaaddiga ka dhigay kali wax qoondeeya

6. Cidi xiise uma qaayibteen qoof hadduun jirine

7. Waa qisaasta qoonkaan ayidin qawracaa xiga’e

8. Isqoofaadhintiisii Saddaam kibir isqaadqaadki

9. Qar ka tuuryey qooquu isbidey qoodh inuu yahay

10. Qaraxii Baqdaad iyo wixii samada qiiqaabey

11. Qaddar gaaban waataa Ciraaq badahu qaadeene

12. Haddii uu Qabbaan noqon lahaa kabaha soo qaada

13. Oo qoorta raaricin lahaa lama qisaaseene

14. Hilfihiiba loo qaad ninkii qaraxa weynaaye

15. Iyagoo quraankii watiyo qad iyo looxdoodi

16. Iyagoy gadhkaa qirada weyn qariyey laabtooda

17. Qararkii ku dumey Taalibaan qawyihii ololey

18. Tooroboora qiiqii ka baxay qaaci lagu saydhay

19. Qiyaastooda lama koobi karo qoonki baaba’aye

20. Qiyaamaha hortii wayagaa qaamudkood galaye

21. Qarni buu jirsaday weerarkey qaadey Falastiine

22. Halgankii qasaarow hankii guusha loo qabaye

23. Qudus iyo dhulkii laga qabsadey lagaba qiil waaye

24. Laga qanac inay qaran noqdaan calanna qaataane

25. Qasabbey Yuhuud ku hirgasheen waxay qorsheysteene

26. Si aan qoysna qoys oogu tagin qaybta cududooda

27. Qoqob lagu tigtigey waygaa qooley siliggiiye

28. Asay naagi qaaddiyo ilmada qoysey maradeeda

29. Qabriyada fatahay geeridaan abid qaboobeene

30. Qab la’aanta Carabeed dadaan qiiro dirireynin

31. Quwad li’ida waa waxa darteed quudhsigaa badaye

32. Qiyaasaha Qadaafiba markuu sabanka qiimeeyey

33. Inay qayb libaax tahay ku qanac quusey tabartiise

34. Wixii uu qarsaday waysagaa qubey rasaastiiye

35. Qunyar socod hadduu noqon rabaa cidiba qoomeyne

36. Qallacada Iraan wayadaa qaylo dhaanta ahe

37. Qudbadaha Nijaaniyo shacbiga qiiro galintiisa

38. Waxa uu la qalab leeyihiyo meela qaban waaga

39. Waa qalaanqal kaa galay wuxuu qaaqda la hayaaye

40. Kim Il Sungaba laga quusey oo qaadan waa aamare

41. Gantaalaha qotoma ciidaankaa weerarka u qaydan

42. Haddaan lagu qadarin waa horey qaban lahaayeene

43. Quruumaha midoobiyo sharcigi loo qarrirey uunka

44. La qallooci xeerkii qorraa taniyo Qaabiile

45. Qaacada inuu qaranka kastaba jeedin karo qawlki

46. Qisadii micnaha loo sinnaa qalinki beenowye

47. Qar u ciiryey misaankii ay ku qodbanaayeen

48. Quwad kaliye iyo waa qarbiga cidi qilaafeyne

49. Qadhyankiisa Ruushkii wax badan Yurub ka qaylyeeysey

50. Qalfoof weeye hoos madhan shacbiga qirada weynaaye

51. Qurubquruba loo goo dadkii qaatay shuuciga’e

52. Isagaaba qiilqiil ku jira qaxarka joogaaye

53. Guwantanamo dadkaa lagu qabirey eedna lagu qaadin

54. Qabka ayda nimankaa sidii qumayadii jiifa

55. Jidh qaraaca quud lagu dhibiyo qoobka laga dhaadey

56. Qiimigii Insaankiyo wataa qaawan sharaftiiye

57. Soomaalida isqalan aafadaa qixin malaayiinta

58. Waxaan loo qaddarineyn waxayn cidi u soo qaadan

59. Waxa la isku qiimeynayeen qaybna ku lahayn

60. Inta uu adduunkaa qalliban qaalmo roganaayo

61. Qorshe iyo caqliba hayga filin quusad baan ahaye