Home	Cumar Fakad
Gantaal

Waa gabaygii 3aad ee Fakad uu ku lahaa Silsiladda Daarood ku Fuul. Wuxuu ugu jawaabayaa Cali Banfis oo ah ninkii gabayda billaabay. Gabayga uu Fakad ka jawaabayo waxaa ka mid ahaa meerisyadan hoose:

Cali Banfis ku ye:

Goobtii Mandheeriyo halkii gaadhka laga toogtay
Sow buuralaydii aan galay gacan libaax ma aha
Gariirshaha qalalan sow wadnaha kaan u galay ma aha
Giddigiiba Daaroodku sow kaan genbiyey ma aha.

Haddaba, Fakad ayaa Cali Banfis gabaygan jawaabta ah u dedejiyey, wuxuuna Fakad yidhi:

Sidii Goodirtii geela iyo gaani rimi weyday
Oo awr garuun ahi habeen gunuca soo saaray
Oo Eebahay u guntayoo goojo la amaartay
Oo geesigii maali jiray gudimo weyn qaatay
Oo ganaha laga gaaga tiray gurina loo diiday
Oo meel aan geed qaaq lahayn garagaraynaysay
Oo guga gugeedii galayoo kurusku giig beelay
Oo waxay u gaadgaatisaba galab ku fool qaaday
Oo meel gabbood ahoo bannaan gilin yar soo tuurtay
Oo gudaha uurkii ku jira gorofka loo qaaday
Ooy soo godleen wiilsahii gaydha celinaayey
Oo gorafka weyn iyo markaa abur ku geyngeyntay
Oo gaajadii lagaga baxay yaan gadeed ahaye
Iga gura gufaacadanu waa godoladaydiiye

Geeraraday soo direen labada guuguule
Garranka iyo isyeelyeelku waa gad ay yaqaanaane
Garaadxumada waa lagu yaqaan goxoshka Iidoore
Abidkoodba gaal urahayey daba gucleeyaane
Geeddiga halkaanu u rarnaye gibilka loo taagay
Guga da’ay gudgudahaa unkaday galalka doogoobay
Bal inay gartaan baan lahaa godolka Maandeeqe
Kol hadday Gamaareey noqdeen goysay ibaheeda
Gaar howga joogeen bulshada gaajo iyo oone
Waxa maanta loo gabagabayn galabsigoodiiye
Gafuurka xun day waa kaan wax badan gaabsadaay idhiye

Afartaa garnayl kugu dhiciyo gumuc rasaaseed dheh
Gebagebada meel laysku helay gaylan dirireed dheh
Gudcur dam’ ah habaynkoo galiyo galab colaadeed dheh
Good iyo mas meel ay galeen godo abeesaad dheh
Gebi dumay waraar kugu gu’iyo geylo soo jabay dheh
Geeraaradaan tirin jiriyo gabayadaydii dheh

Caliyow garrida aan tuntiyo guuxa iyo faanku
Gacmo madhan adoo taagan baad wali galaydhyeyne
Horta eeg aan googaatanee laba godlow heedhe

Ma garaabayahow Eebahay gooyey xadhigiisa
Guushaad ku faanayso iyo goolka aad dhalisay
Asgari jeelka aad ugu gashayoo gaaday saw ma aha
Saw laba nin ood gawracdayoo gama’sanayd ma aha
Gashi aanu kugu yeelaniyo godob xun saw ma aha
Guuguulayhow saw rag aydun u gafteen ma aha
Gacanqaad xun ood eeday ood gubatay saw ma aha
Geesaha markaan kaa mareen gaadhka kugu meershay
Saw buuralaydii aad gasheen gacan libaax ma aha?

Goobtaad ku ceebawday eed gorortay saw ma aha
Saw haadka gooraamayaa meydka gegan ma aha
Gulufkaydun nagu weerarteen galalaf saw ma aha
Saw geenyadiinii xumayd taa galgalan ma aha
Gaashaamo Habar Yoonis saw taan ganbiyey ma aha
Gaagaabantii Habar Jecliyo Arab go’een ma aha
Guryahay dageen Ciidagale galangal saw ma aha
Sacad Muuse saw kaa gudban ee gaal u tagay ma aha
Gariirkaad maqlaysaayi saw geeshkayaga ma aha
Soomaali waad kala gurtaye saw gobtii ma aha
Gantaalooyinkay ridahayaan gacaladay ma aha
Saw geesiyaal ila dhashoo gaani wada ama aha
Gaashaanbuurta Waarsiyo Amxaar geed xunkii ururay
Garba-rogane Iidoorkiyow gubaya saw ma aha
Galaayuuska qayladani saw ii gurmada ma aha
Gabaygaagu oohin saw go’e baroor ma aha
Kayguna gantaal kugu dhaciyo, gumacyo saw ma aha